އެސް.އެސް.ސީ އިމްތިޙާނުގެ ސުވާލުކަރުދާސް 1 އޮންނާނެގޮތް:

ވަޤުތު: 90 މިނިޓް (1 ގަޑި 30 މިނިޓް)
ސުވާލުގެ ޢަދަދު: 30 ސުވާލު
ޖުމްލަ މާކްސް: 30 މާކްސް (ކޮންމެ ސުވާލަކަށް 1 މާކްސް – މުޅިކަރުދާހުގެ ޖުމްލަ މާކްސް 30)

ސުވާލު ކަރުދާސް 1 ގައި ހިމެނޭނީ ގްރޭޑް 9 ގެ ފޮތުންނާއި ގްރޭޑް 10 ގެ ފޮތުން (ދެފޮތުންވެސް) ތާރީޚާއި ޙަޟާރާތު ޔުނިޓާއި އިސްލާމީ ޘަޤާފާގެ ޔުނިޓުގެ އިތުރުން އިސްލާމީ އަޚްލާޤު ޔުނިޓެވެ. މިކަރުދާހަކީ ކުރުޖަވާބު ދޭގޮތަށް ފަރުމާކުރެވިފައިވާ ސުވާލު ކަރުދާހެކެވެ.

ސުވާލު ކަރުދާސް 1 ގައި ހިމެނޭ ގިނަ ސުވާލުތަކަށް ލިޔަން ޖެހޭނީ އެންމެ ޖަވާބެކެވެ. އެހެންނަމަވެސް ބައެއް ސުވާލުތައް ފަރުމާކޮށްފައި ވާގޮތުން ދެ ޖަވާބެއް ލިޔަން ވެސް އަތުވެދާނެއެވެ. ދަރިވަރުން ކަރުދާސް 1 އަށް ތައްޔާރުވާއިރު، ފިލާވަޅުތަކުން ކޮންމެހެން ހިތުދަސްކުރަންޖެހޭ ބައިތައް ރަނގަޅަށް ހިތުދަސްކޮށްފައި ހުރުން ވަރަށް މުހިންމުވާނެއެވެ. މިގޮތަށް ފިލާވަޅުތައް ދަސްކުރާއިރު ޕޮއިންޓްފޯމަށް ހުންނަ ބައިތަކުން މަދުވެގެން 2 ނުކުތާއެއް ދަސްކުރުން ވަރަށް މުހިންމުވާނެއެވެ.

ކަރުދާސް 1 ގެ ހުރިހާ ސުވާލަކަށް ވެސް ދަރިވަރުން ޖަވާބުދޭން ޖެހޭނެއެވެ. މިއީ މަޖުބޫރު ސުވާލުތައް ހިމެނޭ ސުވާލުކަރުދާހެކެވެ. އެހެންވީމާ މިކަރުދާހުގެ އެއްވެސް ސުވާލަކަށް ޖަވާބުނުދީ ދޫކޮށްލައިގެން ނުވާނެއެވެ. ކަރުދާސް 1 ގައި ސުވާލުއަންނާނެ ގޮތް ތިރީގައި އެވަނީއެވެ.

ސުވާލުކަރުދާސް 1 ގައި ސުވާލުތައް ތަރުތީބު ކުރެވިފައިވާނެގޮތް

1- އިސްލާމީ ތާރީޚާއި ޙަޟާރާތުގެ ޔުނިޓް:

މި ޔުނިޓުން ތިންފެންވަރުގެ ސުވާލު އަންނާނެއެވެ. އެއީ:- މަޢުލޫމާތުގެ 2 ސުވާލާއި ދޭހައިގެ 2 ސުވާލާއި ބޭނުންކުރުމުގެ 1 ސުވާލެވެ. މަޢުލޫމާތުގެ ސުވާލުގެ ގޮތުގައި އޮންނާނީ ސުވާލު ކަރުދާހުގެ ސުވާލު ނަންބަރު 1 އަދި ސުވާލު ނަންބަރު 2 އެވެ. މިއިން ކޮންމެ ސުވާލަކަށް ވެސް ލިބޭނީ 1 މާކުހެވެ. އިސްލާމީ ޙަޟާރާތުގެ ޔުނިޓުން ދޭހައިގެ ސުވާލުގެ ގޮތުގައި ހިމަނައިފައިވާނީ ޖުމްލަ 2 ސުވާލެވެ. އެއީ، ސުވާލު ކަރުދާހުގެ، ސުވާލުނަންބަރު 3 އަދި ސުވާލުނަންބަރު 4 އެވެ. މި ޔުނިޓުން ބޭނުންކުރުމުގެ ސުވާލުގެ ގޮތުގައި އޮންނާނީ އެންމެ ސުވާލެކެވެ. އެއީ، ސުވާލު ކަރުދާހުގެ، ސުވާލު ނަންބަރު 5 އެވެ.

އިސްލާމީ ތާރީޚާއި ޙަޟާރާތު ޔުނިޓުން އިމްތިޙާން ކަރުދާހުގައި (ސުވާލުކަރުދާސް 1 ގައި) އޮންނާނީ ޖުމްލަ 5 ސުވާލެވެ. އެއީ ސުވާލު ކަރުދާހުގެ، ސުވާލު ނަންބަރު 1 އިން ސުވާލު ނަންބަރު 5 އަށެވެ. މި ފަސްސުވާލަށް ކަނޑައެޅިފައިވާނީ ޖުމްލަ 5 މާކުހެވެ.

2- އިސްލާމީ ޘަޤާފާ ޔުނިޓް

އިސްލާމީ ޘަޤާފާގެ ޔުނިޓުންވެސް ސުވާލުކަރުދާހުގައި ހިމަނައިފައިވާނީ 3 ފެންވަރެއްގެ ސުވާލެވެ. އެއީ މަޢުލޫމާތުގެ 4 ސުވާލާއި ދޭހައިގެ 2 ސުވާލާއި ބޭނުންކުރުމުގެ 1 ސުވާލެވެ. ޘަޤާފާ ޔުނިޓުން މަޢުލޫމާތުގެ ސުވާލުގެ ގޮތުގައި އޮންނާނީ ސުވާލު ކަރުދާހުގެ ސުވާލު ނަންބަރު 6، 7، 8 އަދި 9 މިއިން ކޮންމެ ސުވާލަކަށް ވެސް ދީފައިވާނީ 1 މާކުހެވެ. މި ބައިގައި ދޭހައިގެ ސުވާލުގެ ގޮތުގައި އޮންނާނީ، ސުވާލު ކަރުދާހުގެ، ސުވާލު ނަންބަރު 10 އަދި 11 އެވެ.  ބޭނުންކުރުމުގެ ސުވާލުގެ ގޮތުގައި ދީފައި އޮންނާނީ ސުވާލު ކަރުދާހުގެ، ސުވާލު ނަންބަރު 12 އެވެ.

އިސްލާމީ ޘަޤާފާ ޔުނިޓުން ސުވާލު ކަރުދާހުގައި އޮންނާނީ ޖުމްލަ 7 ސުވާލެވެ. އެއީ ސުވާލު ކަރުދާހުގެ ސުވާލު ނަންބަރު 6 އިން ފެށިގެން ސުވާލު ނަންބަރު 12 އަށެވެ. ޘަޤާފާ ޔުނިޓުން ދީފައިވާ 7 ސުވާލަށް ލިބޭނީ ޖުމްލަ 7 މާކުހެވެ.

3- އިސްލާމީ އަޚްލާޤު ޔުނިޓް

އިސްލާމީ އަޚްލާޤު ޔުނިޓަކީވެސް އެސް.އެސް.ސީ އިމްތިޙާނުގައި ސުވާލު ކަރުދާސް 1ގައި ހިމަނައިފައިވާ ޔުނިޓެކެވެ. މިޔުނީޓުން ސުވާލު ކަރުދާހުގައި ޖުމްލަ 18 ސުވާލު ހިމަނައިފައިވެއެވެ. އެއީ މަޢުލޫމާތުގެ 8 ސުވާލާއި ދޭހައިގެ 6 ސުވާލާއި ބޭނުންކުރުމުގެ 4 ސުވާލެވެ. މި ޔުނިޓުން މަޢުލޫމާތުގެ ސުވާލުގެ ގޮތުގައި ހިމަނައިފައި އޮންނާނީ، ސުވާލު ކަރުދާހުގެ، ސުވާލު ނަންބަރު 13 އިން ފެށިގެން 20 ވަނަ ސުވާލުގެ ނިޔަލަށެވެ. ދޭހައިގެ ސުވާލުގެ ގޮތުގައި ހިމަނައިފައިވާނީ ސުވާލު ކަރުދާހުގެ، ސުވާލު ނަންބަރު 21 އިން 26 އަށެވެ. އަދި ބޭނުންކުރުމުގެ ސުވާލުގެ ގޮތުގައި ހިމަނައިލައިފައިވާ 4 ސުވާލަކީ، ސުވާލު ކަރުދާހުގެ، ސުވާލު ނަންބަރު 27 އިން 30 އަށެވެ.

އިސްލާމީ އަޚްލާޤު ޔުނިޓުން އަންނާނީ ޖުމްލަ 18 ސުވާލެވެ. އެއީ ސުވާލު ކަރުދާހުގެ ސުވާލު ނަންބަރު 13 އިން ފެށިގެން ސުވާލު ނަންބަރު 30 އަށެވެ. ޘަޤާފާ ޔުނިޓުން ދީފައިވާ 18 ސުވާލަށް ލިބޭނީ ޖުމްލަ 18 މާކުހެވެ.

ކަރުދާސް 2

ސުވާލު ކަރުދާސް 2 ގައި ހިމެނޭނީ ގްރޭޑް 9 ގެ ފޮތުންނާއި ގްރޭޑް 10 ގެ ފޮތުން (ދެފޮތުންވެސް) އިސްލާމީ ޢަޤީދާގެ ޔުނިޓް އާއި ޙަދީޘް ޢިލްމުގެ ޔުނިޓް އަދި އިސްލާމީ ފިޤުހު ޔުނިޓެވެ. މިދެންނެވި ތިން ޔުނިޓުން ހަތަރު ފެންވަރެއް ސުވާލު، ސުވާލު ކަރުދާސް 2 ގައި ހިމެނޭނެއެވެ. އެއީ މަޢުލޫމާތުގެ ސުވާލާއި ދޭހައިގެ ސުވާލާއި، ބޭނުންކުރުމުގެ ސުވާލުގެ އިތުރުން ބޭނުން ކުރުމަށްވުރެ މަތީފެންވަރުގެ ސުވާލެވެ. ކަރުދާސް 2 ގައި ޖުމްލަ 25 ސުވާލު ހިމަނައިފައި އޮންނާނެއެވެ. އެހެންނަމަވެސް ދަރިވަރުން ޖަވާބުދޭން ޖެހޭނީ 20 ސުވާލަށެވެ.
އެސް.އެސް.ސީ އިސްލާމް މާއްދާގެ ސުވާލު ކަރުދާސް 2 އޮންނާނީ ދެ ސެކްޝަނަކަށް ބަހައިލައިފައެވެ. އެއީ ފުރަތަމަ ބައި، ނުވަތަ މަޖުބޫރު ސެކްޝަން (ހުރިހާ ސުވާލަކަށްވެސް ޖަވާބުދޭންޖެހޭ ސެކްޝަން) އާއި ދެވަނަ ބައި، ނުވަތަ އިޚްތިޔާރީ ސެކްޝަން އެވެ. މަޖުބޫރު ސެކްޝަން އަކީ ސުވާލު ނަންބަރު 1 އިން ސުވާލުނަންބަރު 13 އާއި ހަމައަށް އޮންނަ ބައެވެ. މިބައިގައި ހިމެނޭނީ މަޢުލޫމާތުގެ ސުވާލުތަކާއި ދޭހައިގެ ސުވާލުތަކެވެ. ކަރުދާސް 2 ގެ ފުރަތަމަ ބައި (މަޖުބޫރު ސުވާލުތައް) ގައި ހިމެނޭ ހުރިހާ ސުވާލަކަށް ދަރިވަރުން ޖަވާބު ދޭން ޖެހޭނެއެވެ.
ސުވާލުކަރުދާސް 2 ގެ ދެވަނަ ބައި (އިޚްތިޔާރީ ސުވާލުތައް) ގައި ހިމެނޭ ސުވާލުތަކުން ދަރިވަރުން ޖަވާބުދޭނީ ސުވާލުގައި ޖަވާބު ދޭން ބުނެފައިވާ ގޮތަށް، ޖަވާބު ދޭން ބުނެފައިވާ ޢަދަދަށެވެ. ދެވަނަ ބައި ގައި ހިމެނޭނީ ސުވާލު ނަންބަރު 14 އިން ސުވާލުނަންބަރު 25 އަށެވެ. މިބައިގައި ހިމެނޭ 12 ސުވާލުގެ ތެރެއިން ދަރިވަރުން ޖަވާބު ދޭން ޖެހޭނީ 7 ސުވާލަށެވެ. ކަރުދާސް 2 ގެ މުޅިކަރުދާހަށް ބަލައިލައިފިނަމަ ދަރިވަރުން ޖަވާބުދޭނީ 25 ސުވާލުގެ ތެރެއިން 20 ސުވާލަށެވެ. މިކަރުދާހުގެ ޖުމްލަ ވަޤުތަކީ 2 ގަޑި އިރާއި 15 މިނިޓެވެ. ކަރުދާސް 2 ގެ ޖުމްލަ މާކުހަކީ 70 އެވެ.

(އަންނަ އަންގާރަ ދުވަހު އޮންނާނީ ކަރުދާސް 2 ގެ ބައި)