ދިވެހިބަހުގެ މުއްސަނދިކަން ދައްކައިދޭ އެއް ތަރިކައަކީ، ދިވެހި ޅެންވެރިކަމުގެ އަދަބިއްޔާތު ކަމަށް، ދިވެހިބަހާއި ދިވެހިޅެންވެރިކަމަށް ގިނަ ޚިދުމަތްތަކެއް ކުރައްވާ، ބޭފުޅެއް ކަމަށްވާ ޑރ. އަޝްރަފް ޢަބްދުއްރަހީމް ވިދާޅުވެއްޖެއެވެ.

ޑރ. އަޝްރަފް މިހެން ވިދާޅުވީ، ޒާދު އެކަޑެމީން ހިންގެވި ޅެންވެރިކަމުގެ މަތީފެންވަރުގެ ހުނަރުވެރިކަން ދަސްކޮށްދޭ ކޯސް ނިންމުމުގެ ރަސްމިއްޔާތުގައި ރޭ، ވާހަކަފުޅު ދައްކަވަމުންނެވެ. އޮންލައިންކޮށް ކުރިޔަށް ގެންދެވި މި ކޯސް ނިންމުމުގެ ރަސްމިއްޔާތު ވެސް، ކުރިޔަށް ގޮސްފައިވަނީ އޮންލައިންކޮށެވެ.

ކޯހުގެ ބައިވެރީންނާ މުޚާޠިބު ކުރައްވައި ވާހަކަފުޅު ދައްކަވަމުން ޑރ. އަޝްރަފް ވިދާޅުވީ، ފަހަކަށް އައިސް މި ނިކުންނަ ޅެންތައް ޅެމަކަށް ނުވާކަމަށެވެ. އެހެން އެ ވަނީ ދިވެހިބަހުގެ މުއްސަނދިކަން ނެތިގެން ނޫން ކަމަށް އަޝްރަފް ވިދާޅުވިއެވެ. ދިވެހިބަހުގެ މުއްސަނދިކަން އެންމެ ބޮޑަށް ފެނިގެން ދަނީ، ދިވެހިޅެންވެރިކަމުގެ އަދަބިއްޔާތުގެ ތެރެއިންކަން ފާހަގަ ކުރައްވާ މީގެ ބައެއް ޢިލްމީ ހެކިތައް ވެސް، ދައްކަވައިފައިވެއެވެ.

ބައިވެރީންނާ މުޚާޠިބު ކުރައްވައި އަޝްރަފް ވިދާޅުވީ، ކޯސް ނިމިއްޖެ ކަމަށާއި އާ އެއްޗެހި ތަކެއް މިހާރު ދަސްވެފައިވާނެ ކަމަށެވެ. އެހެންވީމާ، ދެން މި ރޮނގުގައި ކުރިޔަށް ދެވޭނީ، ނުވަތަ ދެމިހުރުމަށްޓަކައި ކަންތައް ކުރާންވީ ގޮތުގެ މިސާލު ޑރ.އަޝްރަފް ގެނެސް ދެއްވީ މިފަދައިންނެވެ.

އަޅުގަނޑު ކުޑައިރު ގެންގުޅުނީން ގޭގައި ވައްލައާ، ކިރުދޫންޏާ، ގާދޫނި. މިތަކެތި އޮޅުކޮށްގެން ގެންގުޅުނީ. ކާންދީ ހަދައިގެން. އެތަކެތި ފެންވަރުގައިގެން. އެއާ، ދޯޅުވި ވަރަކަށް އެއަށް މީހާގެ ދެވިހިފާ މިންވަރު ބޮޑުވާނެ. ޅެން ވެސް، އަދަބިއްޔާތަކީ ވެސް، އެފަދަ އެއްޗެއް. ތި ވެންނެވުނީ އެ ދޮރާށިން. ދެން ޖެހޭނީ ދޯޅަވާން. ރަހުމަތްތެރިވާން. އޮޅުކުރާން. އެތެރެއަށް ވަދެވުނު ވަރަކަށް ގިނަ އެއްޗިހި ފެންނާނެ. ޅެންވެރިކަމުގެ ރޮނގުން ރަނގަޅަށް ވަދެވިއްޖެނަމަ، ދެން ނުނިކުމެވޭނެ: ޑރ. އަޝްރަފް

ރާއްޖޭގައި ނަންހިނގާ މަޝްހޫރު އެތައް ޅެންވެރީންނެއް ބައިވެރިވި، މި ކޯހުގައި ކިޔަވައި ދެއްވައިފައިވަނީ، ރާއްޖޭގައި މިފަހުގެ ތާރީޚުގައި އުފެދުނު އެންމެ މޮޅު ޝާޢިރު، އަލްއުސްތާޛު އާދަމް ނަޞީރު އިބްރާހީމެވެ. ޓިއުޓޯރިއަލް މަސައްކަތްތައް ކުރިޔަށް ގެންގޮސް ދެއްވީ، ކޯހުގައި ބައިވެރިވި ރާއްޖޭގެ މަޝްހޫރު ޅެންވެރިންގެ ތެރޭގައި ހިމެނޭ ޢީސާ ޝަރީފެވެ.

ކޯހުގެ ބައިވެރީން ބުނެފައި ވަނީ މިއީ، ވަރަށް ގިނަ ޢުލޫމާތު ތަކެއް ލިބިގެންދިޔަ ކޯހެއް ކަމަށެވެ. ޅެންވެރިކަމަކީ ކޮބައިކަން އެނގުނީ މިކޯހުން ކަމަށް ބައިވެރީން ފާހަގަ ކޮށްފައިވެއެވެ.