މޯލްޑިވްސް ޕޮލިޓެކްނިކްގައި އޮންލައިންކޮށް ކިޔަވައި ދެއްވަމުން ގެންދެވި ކޯސްތަކުގެ ކިޔެވުން އިއްޔެ އަލުން ފައްޓަވައިފިއެވެ.

ކޮވިޑް-19 މާލެއިން ފެނުމާގުޅިގެން ގައުމީ ފުރަބަންދަކަށް ދިޔަ ހިސާބުން ޕޮލިޓެކްނިކުން ވަނީ އެޗް.ޕީ.އޭގެ އެންގެވުމާ އެއްގޮތަށް ކިޔެވުން މެދުކަނޑައި ލައްވައިފައެވެ. އެހެންނަމަވެސް 2020 މެއި 28 ވަނަ ދުވަހުން ފެށިގެން ފުރަބަންދަން ލުއިތަކެއް ދެއްވުމާއެކު، ޕޮލިޓެކްނިކުން މިވަނީ  އޮންލައިންކޮށް ކިޔަވައި ދެމުން ގެންދެވި ކޯސްތަކުގެ ކިޔެވުން އަނެއްކާވެސް އަލުން އިއްޔެ ފައްޓަވައިފައެވެ.

ޕޮލިޓެކްނިކްގެ ސީ.އީ.އޯ އަޙްމަދު ނާސިރު ވިދާޅުވީ، އޮންލައިންކޮށް ކިޔަވައިދޭން ފައްޓަވައިފައި ވަނީ، ސެޓްފިކެޓް 3 އިން ކަސްޓަމަރ ރިލޭޝަންސް އެންޑް ފްރޮންޓް އޮފީސް ކޯހާއި، ސެޓްފިކެޓް 3 އިން އޮފީސް މެނޭޖްމަންޓް އެންޑް އެޑްމިނިސްޓްރޭޝަން ކޯހާއި އެޑްވާންސް ސެޓްފިކެޓް އިން ސްމޯލް ބިޒިނަސް މެނޭޖްމަންޓް (ސެމިސްޓަރ 1 އަދި ސެމިސްޓަރ 2) ގެ ކޯހާއި، ޑިޕޮލޮމާ އިން އޮފީސް އެޑްމިނިސްޓްރޭޝަން އެންޑް މެނޭޖްމަންޓް (ސެމިސްޓަރ 1 އަދި ސެމިސްޓަރ 2) ކޯސް، ކަމަށެވެ.

އިތުރަށް ވިދާޅުވީ، ޕޮލިޓެކްނިކަކީ، ޒަމާނުއްސުރެ ޓެކްނިކަލް އަދި ވޮކޭޝަނަލް ދާއިރާގެ ކޯސްތައް ކިޔަވައި ދެމުން ގެންދާ ތަނަކަށް ވެފައި، އެ ދާއިރާގެ ގިނަ ކޯސްތަކަކީ، ޕްރެކްޓިކަލް ބައިތައް ހިމެނޭ ކޯސްތަކަކަށް ވާތީ، އެ ކޯސްތައް ފެށުން މިވަގުތައް ފަސްކޮށްލުމަށް ނިންމަވައިފައިވާ ކަމަށެވެ.

ކޮވިޑް-19 ގެ ޙާލަތު ބަދަލުވަމުން އަންނަ ގޮތަކުން އެޗް.ޕީ.އޭ އިން ދެއްވާ ލަފަޔާ އެއްގޮތައް ނިއުނޯމަލްގައި ޕްރެކްޓިކަލް ބައިތައް ހިމެނޭ ކޯސްތައް ފެށުމަށް ވެސް، މިހާރު ތައްޔާރު ވެފައިވާ ކަމަށް ޕޮލިޓެކްނިކުން މަޢުލޫމާތު ދެއްވައެވެ.