އެޑިޔުކޭޝަން މިނިސްޓްރީއާއި ޕީއެސްއެމް ގުޅިގެން ގެނެސްދޭ ހޭލުންތެރި ކުރުމުގެ ޚާއްޞަ ޕްރޮގްރާމް "ދިލާސާ"ގެ ފުރަތަމަ އެޕިސޯޑް މިރޭ ނުވައެއް ޖަހާއިރު، ޓީވީއެމް ޗެނަލުން ދައްކާނެއެވެ.

އެޑިޔުކޭޝަން މިނިސްޓްރީން މަޢުލޫމާތު ދެއްވި ގޮތުގައި މި ޕްރޮގްރާމަކީ ބެލެނިވެރިން އަދި ޖުމްލަކޮށް މުޅި މުޖްތަމަޢަށް އަމާޒުކޮށްގެން ގެނެސްދޭ ޕްރޮގްރާމެކެވެ. މި ޕްރޮގްރާމަކީ ސިލްސިލާއެއްގެ ގޮތުގައި ހަފުތާއަކު ދެ ރޭ ޓީވީއެމް ޗެނަލުން ގެނެސްދޭ ޕްރޮގްރާމެކެވެ.

ދިލާސާ ޕްރޮގްރާމުގެ މައިގަނޑު މަޤުޞަދަކީ، ކޮވިޑް-19 ގެ މި ޙާލަތުގައި ސްކޫލްތައް ހުޅުވުމަށް ތައްޔާރީތައް ވަމުންދާތީ، ކަމާގުޅޭ އިދާރާތަކުން ބެލެނިވެރީންނާ ހަމައަށް ކޮންމެހެން ފޯރުކޮށްދޭން ޖެހޭ ގިނަ މަޢުލޫމާތުތައް ފޯރުކޮށް ދިނުމެވެ. މިގޮތުން މިޙާލަތުގައި ސްކޫލްތައް ހުޅުވި ކުރިޔަށް ދާއިރު ބެލެނިވެރީން ސަމާލުކަން ދެއްވަންވީ ކަންތައްތަކާއި، ދަރިވަރުންގެ ދިރިއުޅުމުގެ ކަންކަމާއި ކިޔެވުމުގެ ކަންކަމުގައި އުޅުން ބަހައްޓާންވީ ގޮތުގެ މަޢުލޫމާތު، ދިލާސާ ޕްރޮގްރާމުގެ ޒަރިއްޔާއިން ފޯރުކޮށް ދެވޭނެ ކަމަށް އެޑިޔުކޭޝަން މިނިސްޓްރީގެ ޑެޕިއުޓީ މިނިސްޓަރ މުޙައްމަަދު އިޙްސާން ވިދާޅުވިއެވެ. މީގެ އިތުރުން ދަރިވަރުންނަށް ތަޢުލީމު ނުވަތަ އުނގަންނައި ދިނުމަށްޓަކައި އިންތިޒާމް ކުރެވިފައި ހުރި ކަންތައްތަކާއި، އަދި އިންތިޒާމް ކުރެވެމުންދާ ކަންތައްތައް ވެސް، ކަމާގުޅުން ހުރި ފަރާތްތަކުގެ އެހީގައި ދިލާސާ ޕްރޮގްރާމުގައި ގެނެސްދޭނެކަމަށް އޭނާ ފާހަގަ ކުރެއްވިއެވެ.

މިރޭގެ ޕްރޮގްރާމް އަމާޒު ކުރެވިފައިވަނީ ޓެލިކިލާހާއި އޮންލައިކޮށް ފޮތް ކިޔުމުގެ އިންތިޒާމްތައް ހަމަޖެހިފައި ވާ ގޮތުގެ މަޢުލޫމާތު ފޯރުކޮށް ދިނުމަށެވެ. ޚާއްޞަކޮށް ދިވެހިބަހުގެ ފޮތްތައް ކިޔުމަށް ހުރި ޕްލެޓްފޯމްތަކާބެހޭ މަޢުލޫމާތު މިރޭގެ ޕްރޮގްރާމްގައި ގެނެސްދެވޭނެއެވެ. މިގޮތުން އެން.އައި.އީގެ ވެބްސައިޓުގައި ޝާއިޢު ކޮށްފައި ހުރި ދިވެހިބަހުގެ ވަރަށް ބައިވަރު ފޮތްތަކާ ހަމައަށް ބެލެނިވެރީން ދާނީ ކިހިނެއްތޯއާއި އެފޮތްތައް ކުދީންނާއެކު ކިޔުމުގައި ޢަމަލުކުރެވިދާނެ ގޮތުގެ މަޢުލޫމާތު ދެވޭނެއެވެ. އަދި ލެޓްސް ރީޑް ޕްރޮގްރާމްގެ ތެރެއިން ފޮތް ކިޔޭނެ ގޮތްތަކާބެހޭ މަޢުލޫމާތު ވެސް މިރޭގެ ޕްރޮގުރާމްގައި އޮޅުންފިލުވައިދެވޭނެއެވެ. ހަމައެއާއެކު ފޮތް ކިޔުމުގެ މުހިންމުކަމުކަމާބެހޭ ގޮތުން ޢިލްމީ ނަޒަރަކުން މަޢުލޫމާތު ފޯރުކޮށް ދެވޭނެއެވެ.

ދިލާސާގެ ދެވަނަ ޕްރޮގްރާމް އަމާޒު ކުރެވިފައިވަނީ، އިންޓަރނެޓްގެ ވަޞީލަތް ބޭނުން ކުރުމާބެހޭ ގޮތުންނެވެ. މިގޮތުން އިންޓަރނެޓް ފައިދާ ހުރި އެއްޗެއްގެ ގޮތުގައި ބޭނުން ކުރާނީ ކިހިނެއްތޯއާއި އިންޓަރނެޓް ބޭނުން ކުރުމުގައި ކުދީންނަށް ދިމާވެދާނެ ނުރައްކާތެރި ކަންތައްތަކުން ސަމާލަތް ވުމަށް ބެލެނިވެރީންނަށް އެޅިދާނެ ފިޔަވަޅުތަކާބެހޭ ގޮތުން މަޢުލޫމާތު ދެވޭނެއެވެ.

ޑެޕިއުޓީ މިނިސްޓަރ އިޙްސާން ވިދާޅުވީ އާ އާންމު ޙާލަތުގައި ކިޔަވައި ދިނުން ކުރިޔަށްދާއިރު ދަރިވަރުންގެ ސަލާމަތާއި ރައްކާތެރި ކަމަށްޓަކައި، އަދި ދަރިވަރުންގެ ކުރިއެރުމަށް ކުރެވިދާނެ ކަންކަމާބެހޭ ވަރަށް މުހިންމު މަޢުލޫމާތު ދިލާސާ ޕްރޮގްރާމުގެ އެހީގައި ފޯރުކޮށް ދެވޭނެ ކަމަށެވެ. އަދި ކުރިޔަށް ހުރި ޕްރޮގްރާމްތަކުގައި ބެލެނިވެރީންނަށް ބައިވެރިވެ، ސުވާލު ކުރެވޭނެ އިންތިޒާމްތަކެއް ހަމަޖެހިގެން ދާނެކަމަށެވެ.