ކޮވިޑް-19 ގެ ސަބަބުން ޓީޗަރުންގެ ހާލަތު ދެނެގަތުމުގެ ދިރާސާއެއް ޓީޗަރސް އެސޯސިއޭޝަން އޮފް މޯލްޑިވްސް އިން ފަށައިފިއެވެ.

އެ ޖަމްޢިއްޔާގެ ސެކްރެޓަރީ ޖެނެރަލް ޢަލީ ނާޒިމް ވިދާޅުވީ، މިފަދަ ދިރާސާއެއް ކުރުމުގެ މައިގަނޑު ބޭނުމަކީ، ކޮވިޑް-19 ގެ ސަބަބުން ނަފްސާނީ ގޮތުން ޓީޗަރުންނަށް ކޮށްފައިވާ އަސަރުތައް ދެނެގަތުމުގެ އިތުރުން، ޓީޗަރުންގެ ދިރިއުޅުމަށް އައިސްފައިވާ ބަދަލުތަކާއި  ކޮށްފައިވާ އަސަރުތައް ދެނެގަތުމެވެ. މި ދިރާސާގެ ސަބަބުން މިނިސްޓްރީ އޮފް އެޑިޔުކޭޝަނުން ކުރައްވަމުން ގެންދަވާ މަސައްކަތް ތަކަށް ވެސް، އިތުރު އެހީތެރިކަމެއް ދެވޭނެ ކަމަށް އުންމީދު ކުރާކަމަށް ނާޒިމް ވިދާޅުވިއެވެ.

ކޮވިޑް-19 ގެ ސަބަބުން ބައެއް ޓީޗަރުން އެބައުޅޭ ވަރަށް ހާލުގަ. ކުލި ދައްކައިފިނަމަ ފެންބިލާއި ކަރަންޓު ބިލު ދެއްކޭނެ ފަދައެއް ނެތް. މީ ވަކި ޓީޗަރުންނެއް ނޫން. މާލޭގައި ކުއްޔަށް އުޅޭ ވަރަށް ގިނަބަޔެއްގެ ޙާލަކީ މިއަދު މީ. އަޅުގަނޑުމެންގެ ޖަމްޢިއްޔާއަކީ، ޓީޗަރުންނާ ގުޅޭ ޖަމްޢިއްޔާ އަކަށް ވާތީ އަޅުގަނޑުމެންނަށް އެންބޮޑު އިސްކަމެއް ދެވޭނީ ފުރަތަމަ އަޅުގަނޑުމެންގެ ޓީޗަރުންނަށް ދެއްތޯ. ބައެއް އަމިއްލަ ތަންތަނުގައި ޚިދުމަތް ކުރައްވާ ޓީޗަރުންގެ ވަޒީފާ ވެސް މިވަނީ ގެއްލިފަ. އެހެންވެ، މި ދިރާސާ މިކުރަނީ: ނާޒިމް

މި ދިރާސާއިން ލިބޭ ނަތީޖާތައް އެޑިޔުކޭޝަން މިނިސްޓްރީއާ ހިއްސާ ކުރައްވާނެއެވެ. އަދި ދަތި ހާލުގައި ތިބި ޓީޗަރުންނަށް އެހީތެރިކަން ފޯރުކޮށް ދީ، އާންމު ހާލަތައް ގެނައުމަށް ކޮށްދެވޭނެ ކަންތައްތަކާބެހޭ ގޮތުން މިނިސްޓްރީއާ މަޝްވަރާ ކުރައްވައިގެން ހައްލު ހޯދުމަށް މަސައްކަތް ކުރައްވާނެ ކަމަށް ނާޒިމް ވިދާޅުވިއެވެ.

ޓީޗަރސް އެސޯސިއޭޝަނަކީ ޓީޗަރުންގެ ޙައްޤުތައް ހޯދައި ދިނުމަށާއި ތަޢުލީމީ ދާއިރާގެ ކަންކަން ރަނގަޅުކޮށް ކުރިއެރުވުމަށް މަސައްކަތް ކުރާ ޖަމްޢިއްޔާއެކެވެ. މިޖަމްޢިއްޔާގެ ފަރާތުން ކުރި ބުރަ މަސައްކަތުން ރައީސް ޔާމީނުގެ ވެރިކަމުގައި ޓީޗަރުންގެ މުސާރައަށް، ކުރިއެރުން ހޯދައި ދީފައިވެއެވެ.