ރެހެންދި ސްކޫލްގެ ޕްރިންސިޕަލް ނާޒިމް ޢަބްދުﷲގެ ހިތްޕުޅުގައި ދަރިވަރުންނަށް އޮތް ލޯބީގެ އިޙްސާސްތައް ބަންޑުން ކޮށްލައްވައިފިއެވެ.

މިނިސްޓްރީ އޮފް އެޑިޔުކޭޝަނާއި ވީ މީޑިއާ ގުޅިގެން ގެނެސްދިން "އައު އާންމު ޙާލަތުގައި ސްކޫލްތައް" މި ޕްރޮގްރާމުގައި ވާހަކަފުޅު ދައްކަވަމުން ނާޒިމް ވިދާޅުވީ، މިވޭތުވެ ދިޔަ ކޮންމެ ދުވަހަކީ ގޭޓު ކުރިމަތިން ދަރިވަރުންނަށް މަރުޙަބާ ކިޔަމުން އައި ދުވަސްތައް ކަމަށެވެ. އެހެން ނަމަވެސް، ކޮވިޑް-19ގެ ސަބަބުން، ޙާލަތު ބަދަލުވެ، ދަރިވަރުންނަށް ކޮންމެ ދުވަހަކު ގޭޓު ކުރިމަތިން މަރުޙަބާ ނުކިޔޭތީ ވަރަށް ބޮޑަށް ހިތްދަތިވާ ކަމަށެވެ. އިތުރަށް ވިދާޅުވީ، ކުޑަކުދިންގެ ދުވަހަކީ، ވަރަށް ބޮޑަށް ޚަރަދު ކޮށްގެން އެކުދީންނަށްޓަކައި ފާހަގަ ކުރައްވާ ޚާއްޞަ ދުވަހެއް ކަމަށާއި އެދުވަސް ވެސް، މިފަހަރު އެކުދީންނާއެކު، ހޭދަ ކުރުމުގެ ފުރުޞަތު ނުލިބުމަކީވެސް، ހިތްދަތި އިޙްސާސްތަކެއް ކުރެވުނު ކަމެއް ކަމަށެވެ.

އާ، އާންމު ޙާލަތުގައި ސްކޫލްތައް ހުޅުވުމަށް ތައްޔާރުވަމުން ދާއިރު، ރެހެންދި ސްކޫލުން ވެސް އަންނަނީ އެކަމަށް ވަރަށް ބޮޑަށް ތައްޔާރު ވަމުންނެވެ. އެކަމަށްޓަކައި ސްކޫލުގައި މިހާރުވަނީ ޓާސްކް ފޯހެއް އެކުލަވައި ލައްވައިފައެވެ. މިޓާސްކް ފޯސް އެކުލަވައި ލައިފައިވަނީ، ސްކޫލުގައި ހިމެނޭ، ހުރިހައި ދާއިރާ ތަކެއްގެ މުވައްޒަފުން ޝާމިލް ކުރައްވައިގެން ކަމަށް ނާޒިމް ވިދާޅުވިއެވެ.

ސްކޫލުން އެކުލަވައިލި މި ޓާސްކް ފޯހުގެ ފަރާތުން މިހާރު ކުރިޔަށް ދަނީ، ސްކޫލުގެ އެސްއޯޕީތައް ތައްޔާރު ކުރުމުގެ މަސައްކަތެވެ. މި އެސްއޯޕީތައް ޓެލެކޮންފަރެންސްގެ ޒަރިއްޔާއިން، ބެލެނިވެރިންނާއި މުދައްރިސުންނާއި ދަރިވަރުންނާ މި ހަފުތާގެ ތެރޭގައި ހިއްސާ ކުރައްވާނެ ކަމަށް ނާޒިމް ވިދާޅުވިއެވެ.

ސްކޫލުގައި ދަރިވަރުންނާއި މުވައްޒަފުންނަށް އެޅިފައިވާ ރައްކާތެރި ކަމުގެ ފިޔަވަޅުތަކާބެހޭ ގޮތުން ވާހަކަފުޅު ދައްކަވަމުން ނާޒިމް ވިދާޅުވީ، ދަރިވަރުންނަށް ސްކޫލަށް އާދެވޭނީ މާސްކު އަޅައިގެން ކަމަށާއި، ސްކޫލަށް ވަދެވޭނީ ޓެމްޕަރޭޗަރ ޓެސްޓު ކުރެވިގެން ކަމަށެވެ.

އަތްދޮވުމަށް ސާޅީސް ހަތަރު ތަނެއް ޚާއްޞަ ކުރެވިފައި ހުންނާނެ. ކޮންމެ ކޮރިޑޯއެއްގެ ދެކޮޅުގައި އަތް ދޮވެވެން ހުންނާނެ. ސިޑިވެސް ހުންނާނީ ދެބައިކޮށްފައި. ލިފުޓަށް އެއްފަހަރާ އެރޭނެ އަދަދު ފެންނާން ހުންނާނެ. ސްކޫލްތެރޭގައި ގައިދުރުކަން އިސްކުރުމުގެ އިންތިޒާމުތަކެއް ރޭވިފައި ހުންނާނެ. ސްޓާފް ރޫމުގެ އިންތިޒާމުތައް ވެސް ކުރެވިފައިވާނީ، ގައިދުރު ކަމަށް އިސްކަން ދީގެން: ނާޒިމް

ނާޒިމް ވިދާޅުވީ އުންމީދަކީ ވީހާވެސް އަވަހަކަށް، ގޭޓު ކުރިމަތިން ދަރިވަރުން ބައްދަލުވެ، އެކުދީންނަށް މަރުޙަބާ ކިޔުން ކަމަށެވެ. ރެހެންދި ސްކޫލުގެ ޓީޗަރަކާއި ބެލެނިވެރިޔަކު ބުނުއްވީ ޕްރިންސިޕަލް ނާޒިމް، ކޮންމެ ދުވަހަކު ވެސް، ދަރިވަރުން ސްކޫލަށް އައުމުގެ ކުރީން އެކުދީނަށް މަރުޙަބާ ކިޔުމަށް ގޭޓުކުރިމަތީގައި ހުންނެވުމަކީ އާންމު ކަމެއް ކަމަށެވެ.