މަތީ ތަޢުލީމުގެ ލޯނަށް ބަދަލުގެނެސް، ހުޅުވައިލި ފުރަތަމަ ފުރުޞަތުގައި ކުރިމަތިލީ ދަރިވަރުންގެ ތެރެއިން 514 ދަރިވަރަކަށް ލޯނު ދޫކޮށްފައިވާ ކަމަށާއި މިކަމަށް 151 މިލިޔަން ރުފިޔާ ޚަރަދުވާނެ ކަމަށް ހަޔަރ އެޑިޔުކޭޝަން މިނިސްޓަރ ޑރ. އިބްރާހީމް ޙަސަން މިއަދު ވިދާޅުވެއްޖެއެވެ.

ހަޔަރ އެޑިޔުކޭޝަން މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ވިދާޅުވީ، މި ފަހަރު ހުޅުވައިލި ފުރުޞަތަށް 1000 ށް ވުރެ ގިނަ ދަރިވަރުން ލޯނަށް އެދި ހުށަހެޅި ކަމަށެވެ. މި ހުށަހެޅުން ތަކުގެ ތެރެއިން ޝަރުތު ހަމަވީ، 514 ދަރިވަރުން ކަމަށާއި، އެ ދަރިވަރުންނަށް މިހާރު ލޯނު ދީފައިވާ ކަމަށެވެ. އޭގެ ތެރޭގައި ހިމެނެނީ، ލައިސަންސް ހޯދަންޖެހޭ ދާއިރާތަކަށް ދޫކުރެވުނު 15 ފުރުޞަތާއި، ޑިޕޮލަމާ ފެންވަރަށް ކިޔެވުމަށް ދޫކުރެވުނު 48 ފުރުޞަތާއި، ޑިގްރީ ފެންވަރަށް ކިޔެވުމަށް ދޫކުރެވުނު 264 ފުރުޞަތާއި، މާސްޓާސް އަށް ކިޔެވުމަށް ދޫކުރެވުނު 160 ފުރުޞަތާއި ޕީއެޗްޑީއަށް ކިޔެވުމަށް ދޫކުރެވުނު 27 ފުރުޞަތެކެވެ.

މިއީ، މަތީތަޢުލީމުގެ ލޯނު ސްކީމަށް ބަދަލު ގެންނެވުމަށްފަހު ރާއްޖެއާއި ރާއްޖެއިން ބޭރުން ތަޢުލީމު ޙާޞިލު ކުރުމަށް ބޭނުންވާ ދަރިވަރުންނަށް ލޯނު ދޫކުރުމަށް ހުޅުވައިލި ފުރަތަމަ ފުރުޞަތެވެ. ފެބްރުއަރީ މަހު ހުޅުވައިލި މި ފުރުޞަތަށް އެދި 1000 ށް ވުރެ ގިނަ ދަރިވަރުން ކުރިމަތިލައިފައިވެއެވެ. ލޯނުތަކުގެ ކަންތައް ހަމަނުޖެހި ލަސްވެގެން ދިޔައީ ކޮވިޑް-19ގެ ސަބަބުން ފުރަބަންދަކަށް ދާން ޖެހުމުން ކަމަށް ހަޔަރ އެޑިޔުކޭޝަން މިނިސްޓްރީން މަޢުލޫމާތު ދެއްވިއެވެ.