ދަރިވަރުން ހޯދަމުންދާ ނަތީޖާއާ އެކުދީންގެ ކިބައިން ފެންނަ ސިފަތަކާ ދިމާ ނުވަނީ، ބެލެނިވެރީންނާއި ސްކޫލްތަކުން ދަރިވަރުން އިމްތިޙާނަށް ތައްޔާރު ކުރުވަން މަސައްކަތް ކުރާތީ ކަމަށް ޣިޔާސުއްދީން އިންޓަރނޭޝަނަލް ސްކޫލުގެ ކުރީގެ ޕްރިންސިޕަލް ޠާހާ ސަލީމް ވިދާޅުވެއްޖެއެވެ.
މިނިސްޓްރީ އޮފް އެޑިޔުކޭޝަނާއި ޓީވީއެމް ގުޅިގެން ގެނެސްދޭ، ދިލާސާ ޕްރޮގްރާމުގައި ވާހަކަފުޅު ދައްކަވަމުން ޠާހާ ސަލީމް ވިދާޅުވީ، އެންމެ ބޮޑު މައްސަލައަކީ ދިރިއުޅުމަށް ކުދީން ތައްޔާރުކޮށް ނުދެވޭތީ ކަމަށެވެ. ބެލެނިވެރީންނާއި ސްކޫލުން ވެސް، ބޮޑަށް މަސައްކަތް ކުރަނީ ރަނގަޅު ނަތީޖާ ހޯދުމަށް ކަމަށް އޭނާ ފާހަގަ ކުރެއްވިއެވެ.
އަޅުގަނޑަށް ހަމަ ސައްތައިން ސައްތަ ޤަބޫލު ކުރެވެނީ ގޭތެރެއިން ވެސް އަދި ސްކޫލުން ވެސް ކުރެވޭ ކަމަކީ، ދަރިވަރުން އިމްތިޙާނަށް ތައްޔާރު ކުރުވުން. ދިރިއުޅުމަށް ތައްޔާރު ކުރަނީކީ ނޫން. ސްކޫލަށް ދިޔައީއްސުރެ ސްކޫލު ނިމެންދެން ކޮންމެވެސް ސިލަބަހެއްގައި އޮތް ފިލާވަޅުތަކެއް ދަސްކޮށް ދެވޭތޯ މި ބަލަނީ. ހަވާސާގައި ނަސޭހަތް ނުދެޔެކޭ ނޫން. ހަވާސާގައި ކަންތައްތަކެއް ދަސްކޮށް ނުދެޔެކޭ ނޫން. އެކަމަކު އެމުނި އެކުލެވިގެން ކިޔަވައި ދިނުމުގެ މަންހަޖުގެ ތެރޭގައި ހިމެނޭ ހުނަރުތަކާއި ސިފަތަކާއި، އެކިއެކި ރަނގަޅު އުސޫލުތަކަކީ މިންކުރެވޭ، އަދި މިންކުރުމަށް ވިސްނާ ކަންތައްތަކެއްކަމުގައ، މިޒަމާން ނިމޭ އިރުގައި ވެސް ނެތް: ޠާހާ ސަލީމް
އޭގެ މިސާލެއްގެ ގޮތުން ޠާހާ ނެންގެވީ ރިޕޯޓުފޮތެވެ. ރިޕޯޓުފޮތް ބައްލަވައި ލައްވައިފިނަމަ ފެނިވަޑައިގަންނަވާނީ، ހިސާބު، އިނގިރޭސި، ސައިންސް ސޯޝަލް ސްޓަޑީޒް ފަދަ މާއްދާ ތަކުން ދަރިވަރަށް ލިބިފައިވާ މާކުސް ކަމަށް ޠާހާ ވިދާޅުވިއެވެ. ކުއްޖާގެ ކިބައިން ފެންނާންޖެހޭ ސިފަތަކާއި އުޅުމާއި އަޚްލާޤު ފަދަ ސިފަތައް ވަނީ، ޓީޗަރަށް ފެންނަ ގޮތަކަށް ދޫކޮށް ލެވިފައެވެ.
ދަރީންނަށް ޒިންމާ އުފުލަން ދަސްކޮށް ދިނުމަކީ ވަރަށް މުހިންމު ކަމެއް ކަމަށާއި އެކުދީންނަށް ދިރިއުޅޭން ދަސްކޮށް ދޭން ޖެހޭކަމަށް ވިދާޅުވެ ވާހަކަފުޅު ދައްކަވަމުން ޠާހާ ވިދާޅުވީ، ކުދީންނަށް ޒިންމާ ނަގަން ނޭގެނީ އެކުދީންނާމެދު ކަންކަން ކުރެވޭ ގޮތުން ކަމަށެވެ.
ކާކުތޯ ބުނީ ދިރިއުޅޭން ދަސްކުރާށޭ. ދުނިޔެއަށް މިއަންނަ ބަދަލުތަކާއެކީގައި އުޅޭން ދަސްކުރާށޭ. ތިމާގެ ފިކުރާ ވިސްނުމާ ރަނގަޅުވާން ޖެހެއޭ. އަޑުއަހާ އެއްޗިއްސާ ފެންނަ މަންޒަރުތަކާ ނޫސްތަކުގައި ހުންނަ ކޮމެންޓްތަކާ، ނޫސްތަކުން ކިޔާ އެއްޗިއްސާ، މީހުން ޕޯސްޓްތަކުގައި ލިޔާ އެއްޗިއްސަކީ، ހަމަ އެހެން ހުރެލައިފައި ވިސްނައި ނުލައި ޤަބޫލު ކުރާންޖެހޭ އެއްޗިއްސެއް ނޫނޭ: ޠާހާ ސަލީމް
ޠާހާ ވިދާޅުވީ ދަރިވަރުން ސްކޫލުން ގެޔަށް ދާ ހިސާބުން ނިދަންވަންދެން ގިނަ ކުދީން ތިބެނީ ފޮތްތަކުގައި ކަމަށެވެ. ނުވަތަ އެއް ޓީޗަރުން، އަނެއް ޓީޗަރަށް، އަބަދުވެސް ޓިއުޝަނުގައި ކަމަށެވެ. ކުދީން ލައްވައި މިގޮތަށް މި މަސައްކަތް ކުރުވުމުގެ އަމާޒަކީ، 10 އަހަރު ނުވަތަ 12 އަހަރު ނިމޭއިރު ހަދާ، ކޭމްބްރިޖް އިމްތިޙާނުން ނުވަތަ އެޑެކްސެލް އިމްތިޙާނުން މޮޅު ނަތީޖާ ހޯދުން ކަމަށް އޭނާ ފާހަގަ ކުރެއްވިއެވެ.
އެހެންވީމާ އެ ކުރާ ކަމަކުން ދެއްތޯ ނަތީޖާ ނުކުންނާނީ. މިގޮތަށް ނަތީޖާއަށް ކުއްޖާ ތަމްރީނު ކުރުވީމަ ކުއްޖާ ފެންނާނީ ޒިންމާދާރު ކުއްޖެއްގެ ގޮތަކުއެއް ނޫން. ދިރިއުޅުމުގެ އެކި ކަންކަމުގައި އެ ކުއްޖާ ޒިންމާދާރު ކުއްޖެއްގެ ގޮތަކުއެއް ނުފެންނާނެ: ޠާހާ ސަލީމް
ތަޢުލީމު ދިނުމުގެ ޙަޤީޤީ ބޭނުމަކީ ކުދީން ދުނިޔެއަށް ތައްޔާރު ކުރުން ކަމަށާއި، އެހެންކަމުން އިމްތިޙާނުން ރަނގަޅު ނަތީޖާ ހޯދުމަށް އަބަދު މަސައްކަތް ކުރުވުމުގެ ބަދަލުގައި ކުދީން ޒިންމާދާރު ކުދިބަޔަކަށް ހަދާން ދަސްކޮށްދޭން ޖެހޭ ކަމަށެވެ. އެކަން ކުރެވޭނީ ނަމޫނާ ދައްކައިގެން ކަމަށް ޠާހާ ވިދާޅުވިއެވެ.
advertisment
advertisment
advertisment