ވާހަކަ ދެއްކުމުގެ މަތީފެންވަރުގެ ހުނަރުތައް އުނގަންނައި ދިނުމަށް ޒާދު އެކެޑަމީން ކުރިޔަށް ގެންދަވާ އަދަބީ ޕްރޮގްރާމު ދަރަޖަ 1 ގެ ދެވަނަ  ބެޗުގެ ދަސްވެނިވުމުގެ ރަސްމިއްޔާތު ބާއްވައިފިއެވެ.

މި ރަސްމިއްޔާތު ބާއްވައިފައި ވަނީ ހުސްވި ޖޫންމަހުގެ 30 ވަނަ ދުވަހުގެ ރެއެވެ. މި ރަސްމިއްޔާތު ޝަރަފުވެރި ކޮށްދެއްވީ  ސިވިލް ސަރވިސް ކޮމިޝަންގެ ރައީސް ޑރ. ޢަލީ ޝަމީމެވެ.

ވާހަކަ ދެއްކުމުގެ މަތީފެންވަރުގެ ހުނަރުތައް އުނގަންނައި ދިނުމަށް ކުރިޔަށް ގެންދާ މި ޕްރޮގްރާމަކީ އޮންލައިންކޮށް އުނގަންނައި ދެވޭ އަދަބީ ޕްރޮގްރާމެކެވެ. ކުޅަދާނަ ޝާއިރު އަދި ހުނަރުވެރި ވާހަކަ ދެއްކުންތެރިޔާ އާދަމް ނަޞީރު އިބްރާހީމްގެ މޭސްތިރިކަމުގެ ދަށުން އެކުލަވައިލައި ކުރިޔަށް ގެންދެވޭ މި ކޯހުގެ މުދައްރިސަކީ ވެސް ހަމަ އާދަމް ނަޞީރު އިބްރާހީމެވެ. މި ފަހަރުގެ ކޯހުގައި ގެސްޓް ލެކްޗަރަރ އެއްގެ ގޮތުން ކްރިޓިކަލްތިންކިންގ ގެ ގަޑި ނަންގަވައި ދެއްވީ ލެފްޓިނެންޓް ކަރނަލް ޙަސަން ޢާމިރު ކަމަށް ޒާދު އެކެޑަމީން މަޢުލޫމާތު ދެއްވިއެވެ.

ޒާދު އެކެޑަމީން ކުރިޔަށް ގެންދެވި މި ފަހަރުގެ މި ޕްރޮގްރާމު 45 ބޭފުޅަކު ފުރިހަމަ ކުރެއްވިއެވެ. އަދި ދަސްވެނިވުމުގެ ރަސްމިއްޔާތުގައި 30 ބޭފުޅަކު ތަޤުރީރު ތައްޔާރުކުރައްވައި ތަޤުރީރު ކުރެއްވިއެވެ.

ފަނަރަ ދުވަހުގެ މުއްދަތަށް ކުރިޔަށް ގެންދެވި މި ކޯހުގައި ޢުމުރުން 16 އަހަރުން ފެށިގެން 50 އަހަރުން މަތީގެ ބޭފުޅުން ވެސް، ކާމިޔާބު ކަމާއެކު ކޯހުގައި މަސައްކަތް ކުރައްވައިފައި ވާ ކަން ޒާދު އެކެޑަމީން ފާހަގަ ކުރައްވައެވެ. ކިޔެވުން ކުރިޔަށް ގެންދަވައިފައިވަނީ، ރޭގަނޑު 10 ން 12 ށެވެ. މި ކޯހުގެ މަސައްކަތްތައް ފަރުމާ ކުރެވިފައިވާ ގޮތުން ކޯހުގެ ކޮންމެ ބައިވެރިޔަކު ވެސް، ގާތްގަނޑަކަށް 50 ގަޑި އިރާއި 60 އަޑި އިރާ ދެމެދުގެ ވަގުތު ހޭދަކުރަން ޖެހޭނެ ކަމަށް ޒާދު އެކެޑަމީން މަޢުލޫމާތު ދެއްވިއެވެ.

ދަސްވެނި ވުމުގެ މި ރަސްމިއްޔާތުގައި ބައިވެރީންގެ ތަޤުރީރުކުރުމުގެ ހުނަރު ދައްކައިލެވޭ ވީޑިޔޯ ރިޕޯޓެއް ގެނެވުނެވެ.

އޮންލައިންކޮށް ކުރިޔަށް ގެންދެވުނު ދަސްވެނިވުމުގެ މި ރަސްމިއްޔާތުގައި ޝަރަފުވެރި މެހުމާނު ޑރ ޢަލީ ޝަމީމު ދެއްކެވި ވާހަކަފުޅުގައި ވާހަކަދެއްކުންތެރިކަމުގެ ބޭނުންތެރިކަމާއި އޭގެ އުކުޅުތަކުގެ މައްޗަށް އަލިއަޅުއްވައިލެއްވިއެވެ. ހަމަ އެހެންމެ އދ. އާއި އަދި އެ ނޫން ވެސް މަތީފެންވަރުގެ އެކި މުއައްސަސާތަކުގައި އެމަނިކުފާނު މަސައްކަތްކުރެއްވި އިރު މި ދާއިރާއިން ކުރެއްވިފައިވާ ބައެއް ތަޖުރިބާތައް ބައިވެރީންނާ ހިއްސާކުރެއްވިއެވެ.

ގިނައިން ފޮތް ކިޔަންވާނެ. މަޢުލޫމާތު ހުންނަންވާނެ. އެތައް ފަހަރަކު ފަރިތަކުރަންވާނެ. ބިރުކެނޑެންދެން އަމިއްލަ ނަފުސަށް އަޑު އިއްވައިގެން ބާރަށް ފަރިތަކުރަންވާނެ: ޑރ. ޢަލީ ޝަމީމް

ކޯހުގެ ބައިވެރީންނާ މުޙާޠަބު ކުރައްވައި ވާހަކަފުޅު ދައްކަވަމުން ކޯހުގައި ކިޔަވައިދެއްވި ބައިތަކުގެ އޮއްޓަރާއި މުދައްރިސްގެ ހުނަރުވެރިކަމުގެ މައްޗަށް ފުރިހަމައަށް އިތުބާރު ކުރައްވާ ކަމަށް ވިދާޅުވެ ތާރީފުކުރެއްވިއެވެ.

މި ޖަލްސާގައި ބައިވެރީންގެ ފަރާތުން ވާހަކަ ދެއްކި ދަރިވަރު ހާމަކުރި ގޮތުގައި ބައިވެރީން ކޯހާ މެދު ހިތް ހަމަ ޖެހޭ ގިނަ ސަބަބުތަކުގެ ތެރެއިން އެއް ސަބަބަކީ ގަޑިޔަށް ފެށުމާއި ގަޑިޔަށް ނިންމުމެވެ. ބޭކަރު އެއްވެސް ވަގުތެއް ނޯންނަ ގޮތަށް މުޅި ކޯހުގެ ހުރިހައި ވަގުތެއް ކޮންމެ ގަޑިޔެއްގައި ރާވައިލެވިފައި އޮތުމެވެ. ހަމަ އެހެންމެ ވަރަށް ތަރުތީބުން ވަރަށް ފަރުވާތެރިކަމާއެކު މުޅިން އާ ބަހަވީ އަދި ފަންނީ ހުނަރުތަކެއް ދަސްކޮށްދެއްވިކަން އޭނާ ފާހަގަ ކުރިއެވެ. މީގެ އިތުރަށް ކޯހުގެ ރަސްމީ ގަޑި ފިޔަވައި އެހެން ގަޑިތަކުގައި ވެސް ބައިވެރީންނަށް ލިބުނު އެހީތެރިކަން އޭނާ  ފާހަގަކުރިއެވެ.

އެންމެ ހިތް ހަމަ ޖެހެނީ ވަރަށް އާ ވަރަށް ޢިލްމީ މަޢުލޫމާތުތަކެއް ލިބުނީތީ. އަދި ތަޤުރީރު ތައްޔާރު ކުރުމުގެ ހުރިހާ މަރުޙަލާއެއްގައި ކޮންމެ ދަރިވަރަކަށް ވަކި ވަކިން އެތައް ފަހަރަކު އުސްތާޛު ވަގުތު ދެއްވީތީ: ކޯހުގެ ބައިވެރިޔެއް

މި ރަސްމިއްޔާތުގައި ޒާދު އެކެޑަމީގެ މަސްއޫލުވެރިޔާ ޢަލީ އިބްރާހީމް ދީދީ ދެއްކެވި ވާހަކަފުޅުގައި ޝަރަފުވެރިމެހުމާނަށާއި ކޯހުގެ މުދައްރިސް އާދަމް ނަޞީރު އިބްރާހީމަށް ޝުކުރުއަދާކުރެއްވިއެވެ. އާދަމް ނަޞީރު އިބްރާހީމްގެ ވާހަކަފުޅުގައި ވެސް ޝަރަފުވެރި މެހުމާނު ޑރ ޢަލީ ޝަމީމަށާއި ޒާދު އެކެޑެމީއަށާއި އަދި ކްރިޓިކަލް ތިންކިންގ ގެ ގަޑި އިންތިޒާމު ވެގެން އައި ގޮތް ފާހަގަކުރައްވައި ދިވެހި ރާއްޖޭގެ ޤައުމީ ދިފާޢީ ބާރަށާއި ލެފްޓިނެންޓް ކަރނަލް ޙަސަން ޢާމިރަށް ޝުކުރު އަދާކުރެއްވިއެވެ.