ކުދީންގެ ކިބައިގައި ޒިންމާތައް އަށަގެންނުވޭނީ ކުދީންނަށް ޒިންމާތައް އުފުލަން ފުރުސަތު ދިނުމުގެ އިތުރުން އެ ކަން ބަލައި މޮނީޓަރ ކުރެވިގެން ކަމަށް ޤައުމީ ޔުނިވަރސިޓީގެ ފެކަލްޓީ އޮފް އެޑިޔުކޭޝަންގެ ލެކްޗަރަރ ލީލާ އަޙްމަދު ވިދާޅުވެއްޖެއެވެ.

ލީލާ މިގޮތަށް ވިދާޅުވީ ޓީވީއެމް އިން ރޭ ގެނެސް ދިން،  ދިލާސާ ޕްރޮގުރާމުގައި 'ބެލެނިވެރކަން: އިންތަކާ މިންތައް’ މި މައުޟޫއަށް ވާހަކަފުޅު ދައްކަވަމުންނެވެ.

މަސައްކަތް ކުރާންވީ ދުރު މުސްތަގުބަލެއްގައި އެކަނިމާ އެކަނި އުޅެން ދަންނަ ކުއްޖެއް ތައްޔާރު ކުރަން. މުހިންމުކަން ދޭންވީ  ދުވަހީ ކަން ކަމަކަށް ނޫން، މުސްތަޤުބަލަށް ފޯކަސް ކުރުން މާ މުހިންމު: ލީލާ

ލީލާ ވިދާޅުވީ ޒިންމާތައް މިހާރު ވަނީ، އޮޅިފައި ކަމަށެވެ. މިކަން ތަފްސީލު ކޮށްދެއްވަމުން ވިދާޅުވީ ސްކޫލުން ގޭތެރޭގެ ޒިންމާ ނަގާ ކަމަށެވެ. އަދި ބެލެނިވެރިން ސްކޫލުގެ ޒިންމާ ނަގާ ކަމަށެވެ. މިކަން މިހާރު އޮޅުން ބޮޅުންވެއްޖެ ކަމަށާއި މިކަމުން ހުރިހާ ދެރައެއް އާޚިރުގައި ލިބެމުން ދަނީ ކުދިންނަށްކަން ލީލާ ފާހަގަ ކުރެއްވިއެވެ.

އަޅުގަނޑުގެ ދަރިފުޅު ސްކޫލަށް ދިޔައިރު އަބަދުވެސް ހިތަށް އަރާ، ސްކޫލުން ހަދާފަ މިއޮންނަ ވައިބާރ ގުރޫޕް ގައި މެސެޖު މިފޮނުވާ ކަންތައް ހުއްޓޭނެ ދުވަހެއް އަންނާނެ ނަމައޭ، ކުއްޖާ ގެއަށް ގެންނަން ޖެހޭ މެސެޖު މުދައްރިސް ވައިބަރ ގުރޫޕަށް ފޮނުވީމާ، އެހާހިސާބުން ކުއްޖާގެ ޒިންމާ، އެގެއްލުނީ. މަދަރުސާއަށް ގެންދަން ޖެހޭ ތަކެތީގެ ވާހަކަ އައިސް ބުނަންޖެހޭނީ ކުއްޖާ. މުދައްރިސެއް ނޫން. މުދައްރިސްގެ ފޯނު ނަންބަރު ބެލެނިވެރިޔާއަށް ލިބޭކަށް ނުޖެހޭ. ކުދިންގެ ޒިންމާނަގަން ދަސްކޮށްދޭން، މަދަރުސާއިން ކުރަންޖެހޭ ކަންކަން ވެސް ހުންނާނެ. މިގޮތުން ތަކެތި ހަމައަށް ނުގެންދެވުނީމަ، ދެން ކުރިމަތިވާ ކަންކަން ކުއްޖާއަށް ބުނެދޭނީ ސްކޫލުން: ލީލާ

ކުދިންނަށް ޒިންމާ ނަގަން ދަސްކޮށް ދިނުމަށްޓަކައި ގޭތެރެއިން ޒިންމާ ނަގަން ދަސްކޮށްދޭން ޖެހޭކަން ލީލާގެ ވާހަކަފުޅުގައި ފާހަގަ ކުރެއްވިއެވެ. މިގޮތުން ހެނދުނު ހޭލައިގެން އެނދު ތަންމަތި އަޅަން ދަސްކޮށްދިނުން ކަހަލަ ޒިންމާތަކުން ފެށިދާނެ ކަމަށް ލީލާ ކިޔައި ދެއްވިއެވެ. މިކަންކަން ކުރުވުމާއެކު، ކުރޭތޯ ބެލުމަކީ ވެސް، ބެލެނިވެރިޔާގެ ޒިންމާއެއް ކަން ލީލާ ފާހަގަ ކުރެއްވިއެވެ.

ކުދީންނަކީ ދޫނި ތަކެއްފަދަ ބައެއް ކަމަށާއި އެ ކުދީން އަމިއްލައަށް އުދުހެން ޖެހޭ ދުވަހެއް އަދި އަންނާނެ ކަމާއި، ޙާލަތު ނިޔާކުރާ ގޮތަކުން މި މަންޒަރު ބެލެނިވެރިޔާ އަށް ނުފެނި ވެސް ހިނގައި ދާނެ ކަމަށް ލީލާ ވިދާޅުވިއެވެ. އެހެންނަމަވެސް ރަނގަޅަށް އުދުހޭނެކަމާއި، ވެއްޓިއްޖެނަމަ، ތެދުވާނެކަން ބެލެނިވެރިޔާއަށް މިއަދުވެސް ޔަގީންވާން އެބަޖެހޭކަން ލީލާ ކިޔައިދެއްވިއެވެ. އިތުރަށް ވިދާޅުވީ ކުދިން ބައްޓަން ކުރާން މި ލިބެނީ ވަރަށް ކުޑަ މުއްދަތެއް ކަމަށާއި މި މުއްދަތުގެ ތެރޭގައި ދުނިޔެއަށް ދަރިފުޅުގެ ލޯ ހުޅުވަ ދޭން، އެހީތެރިވެ ދިނުމަކީ ވަރަށް މުހިންމު ކަމެއް ކަމަށެވެ.

ދަރިފުޅު ކުރިމަތީގައި ބެލެނިވެރިޔާ ކަންކަމާ ހިތްހަމަ ނުޖެހިގެން މުދައްރިސާ ވާހަކަ ދެއްކުމަކީ ހެދޭ ގޯހެއް. ދަރިފުޅަށް އެއީ ވަރަށް 'އޯކޭ' ކަމެކޭ ވިސްނި، އާޚިރުގައި ދަރިފުޅު އެގޮތަށް އެކަން އެހެން ކުދީންނާމެދު ކުރާނެ. އޭރުން ޙަޤީޤަތުގައި އެ ދަސްކުރަނީ ބުލީ ކުރުމަށް: ލީލާ

ތަޢުލީމީ ދާއިރާގެ ތަޖުރިބާ ކާރު ބޭފުޅުން ފާހަގަ ކުރާއްވާ ގޮތުގައި ރޭގެ ދިލާސާ ޕްރޮގްރާމަކީ، މިހާތަނަށް ބޭއްވި އެންމެ ފެންވަރު ރަނގަޅު ޕްރޮގްރާމެވެ.