ކާމިޔާބު ކުއްޖަކަށް ވުމަށްޓަކައި ގަދައަޅައި މަސައްކަތްކުރާން ހެއްޔެވެ؟

ފައްސި ވިސްނުމެއްގައި ހިތްވަރު ކޮށްލާށެވެ! ކިޔެވުމުގައި ކާމިޔާބު ހޯދުމަކީ ޖަދޫއަކުން ނުވަތަ އެއް ދުވަހަކުން ވާނޭކަމެއް ނޫނެވެ. އެއީ ވަރުގަދަ ޢަޒުމެއްގައި ހިތްމަތާއެކު މަސައްކަތްކުރާ ކުދީންގެ ޙައްޤެކެވެ. އެކި ކުދީންނަށް މިކަމުގެ ބުރަކަން ތަޙައްމަލު ކުރާން ޖެހެނީ އެކި މިންވަރަށެވެ. ނަމަވެސް ކޮންމެ ކުއްޖަކަށް ވެސް އެ ކުއްޖެއްގެ ގޮތުގައި މަސައްކަތް ކޮށްގެން އިންޝާﷲ  ކާމިޔާބީ ޙާޞިލު ކުރެވިދާނެއެވެ.

އެކި މާއްދާ ކިޔެވުމުގައި ތަފާތު އުކުޅުތައް ގެންގުޅެއެވެ. މާއްދާތަކުގެ ތެރެއިން ބަޔޮލޮޖީ އަކީ ކިޔަވަން ވަރަށް ފަސޭހަ މާއްދާއެކެވެ. ނަމަވެސް ކުރިއަށް ދާން ޖެހޭ ތަރުތީބު ވަރަށް މުހިންމެވެ. އެއީ އެ މާއްދާއަކީ އެނގެން ޖެހޭ މަޢުލޫމާތު އިތުރު ވަމުން، އާ ހޯދުންތަކާ ލާ މެހެމުން ދާ މާއްދާ އަކަށް ވާތީއެވެ. ކަން މިހެން އޮތުމާއެކު ބަޔޮލޮޖީ ކިޔެވުމުގައި ތިޔަ ކުދީންނަށް ބޭނުން ކުރެވިދާނެ ބައެއް އުކުޅުތަކަށް ބަލައިލާނަމެވެ. މިއީ، ތިޔަ ކުދީންގެ ތެރެއިން ބައެއް ކުދީން މިހާރުވެސް ކިޔަވާއިރު ގެންގުޅޭނޭ އުކުޅުތަކެއް ކަމުގައި ވެސް، ވެދާނެއެވެ.

ތައްޔާރުވެގެން ކްލާހަށް އައުން

ކުރީދުވަހު ކިޔެވި ފިލާވަޅު ރަނގަޅަށް އެނގުނުތޯ ބަލައިލުން ވަރަށް މުހިންމެވެ. ސަބަބަކީ ދެން އޮންނާނީ އެއާގުޅޭ ފިލާވަޅަކަށް ވާނޭތީއެވެ. މިސާލަކަށް ސެލް އާބެހޭ ފިލާވަޅު ރަނގަޅަށް އޮޅުން ނުފިލާނަމަ ފޮޓޯސިންތެސިސް ފިލާވަޅު ދޭހަވާން އުނދަގޫ ވާނެއެވެ. ހަމައެފަދައިން ކިޔަވަންއޮތީ ކޮންފިލާވަޅެއްތޯ ބަލައިލުން ވެސް، ވަރަށް މުހިންމެވެ. ވީމާ ކޮންމެދުވަހެއްގެ ފިލާވަޅުން އުފެދޭ ސުވާލުތައް ނޯޓުކުރާށެވެ. ޖެހިގެން އަންނަދުވަހު މުދައްރިސް ގާތު އަހައި އޮޅުންފިލުވުމުގެ ޒިންމާ ނަގައި ދަރިވަރަކަށްވާށެވެ.

ފަރުވާތެރިކަމާއެކު އުނގެނުމުގެ ބޭނުމުގައި ފޮތް ކިޔާށެވެ.

ބަޔޮލޮޖީޓެކްސްޓް ނުވަތަ ނޯޓްސް ކިޔާން ވާނެއެވެ. ނަމަވެސް ވާހަކަ ފޮތެއް ކިޔާ ގޮތަކަށް ނޫނެވެ. ފަންސުރަކާއި ލިޔާނޭ ފޮތެއް ކައިރީގައި އޮތުން ވަރަށް މުހިންމެވެ. ކިޔައިފައި ދޭހަވި އެއްޗެއް ލިޔެލުން ނުވަތަ ނޯޓު ކޮށްލުމަކީ ދޭހަވުން އިތުރުވުމާއެކު ހަނދާނުގައި ހަރުލެއްވުމަށް ކުރެވިދާނެ ކަމެކެވެ. އެ ގޮތުން ނޯޓު ކުރާއިރު ޢިބާރާތް ބަދަލު ކޮށްލެވިދާނެއެވެ. ޑައިގްރާމެއް ނުވަތަ ކޮންސެޕްޓް މެޕެއްވެސް ހަދައިލެވިދާނެއެވެ.

ކިޔެވިއެއްޗެއްގެ ޑައިގްރާމެއް ނުވަތަ ކުރެހުމެއް ތައްޔާރު ކޮށްލާށެވެ.

ބަޔޮލޮޖީގައި އުނގެނެންޖެހެނީ  ދިރޭތަކެއްޗާއި އެ ތަކެތިގެ ތަފާތު ނިޒާމުތަކެވެ. ނުފެނުނު ނަމަވެސް ބައެއް ކަންތައް އިޙުސާސް ކުރެވެއެވެ. ބަޔޯ ކިޔަވައިދިނުމުގައި ވެސް، ތިކުދީންގެ މުދައްރިސުން ވަރަށް ގިނައިން ޑައިގްރާމާއި އެކިބާވަތުގެ ޗާޓުތައް ބޭނުންކުރައްވާތީ ތި ކުދީންނަށް ފެންނާނެއެވެ.

އެއީ ކުރެހުމާ ޑައިގްރާމާއި ޗާޓު ބޭނުން ކުރުމުން، ބަޔޮލޮޖީގެ ތަފާތު ނިޒާމުތައް ދަނެގަތުމަށާއި ހަނދާނުގައި ހަރުލައްވަން ފަސޭހަވާނޭކަމުގައި ތަޖްރިބާކާރުން އިރުޝާދު ދެއްވާތީއެވެ. (ޓްރީގަސްޓް،2016). ވިމާ، ތި ކުދީން ފިލާވަޅު ދަސްކުރާއިރު ވެސް މީގެ ބޭނުން ކުރާށެވެ.  ކުރަހާލައިފައި ފެންނަ ހިސާބެއްގައި ތަތްކޮށްލުމަކީ ވެސް، ކުރެވިދާނެ ކަމެކެވެ. މިއާއެކުއެކީގައި ބޭނުން ކުރާންޖެހޭ ބަސްކޮށާރު ނުވަތަ 'ކީޓާރމްސް' ތަކަށް އަހުލުވެރިވުން ވަރަށްމުހިންމެވެ.  މި ކީޓާރމްސްތައް ބަދަލުވެގެން އަންނަ ގޮތްތަކަށާއި ޙާލަތަށް ފަރިތަވާށެވެ.

ހަނދާނުގައި ހަރުލައްވާށެވެ.

ހަނދާނުގައި ހަރުލެއްވުމާ ތިކުދީންގެ ޤާބިލިއްޔަތާ ގުޅުންބޮޑެވެ. ތޫނުފިލިކުދީން މިކަމާ މާބޮޑަށް ވިސްނާކަށް ނުޖެހެއެވެ. ނަމަވެސް ދަސްކުރި އެއްޗެއް ހަނދާނުގައި ހަރުލެއްވުމުގެ ގޮތުން ބޭނުންކުރާ ހުނަރުތަކެއް ހުރެއެވެ. އެއީ ހުރިހާ ކުދީންނަށް ވެސް ހަނދާނުގައި ހަރުލައްވަން އެހީތެރިވެދޭނޭ ކަންކަމެވެ. އޭގެތެރެއިން އެނގުނު އެއްޗެއް އަނެކާއަށް ކިޔައިދިނުމަކީ ވަރަށްފައިދާ ކުރާކަމެކެވެ. (އެލިސަބެތް، 2019). ގޭތެރޭގައި ކޮންމެވެސް މިހަކަށް ހަފުތާއަކު އެއްފަހަރު ނަމަވެސް ބަޔޯ ކިޔަވާދޭށެވެ. ތަޖުރިބާ ކޮށްލާށެވެ. އެއާއެކު އުނގެނެމުން އަންނަ މަޢުލޫމާތު ކްލާސް ކުދީންނާއި ވާހަކަ ދައްކާއިރު މަޖާ ގޮތްގޮތަށް ބޭނުން ކުރާށެވެ.

މަޢުލޫމާތު ގިނަދުވަހަށް ސިކުނޑީގައި ހަރުލެއްވުމަށްޓަކައި މުޠާލިޢާ ކުރުން ގިނަކުރާށެވެ. ހަމައެއާއެކު 'ނެމޮނިކްސް' އާއި 'އެކްރޮނިމްސް' އަކީ ވެސް، ހަނދާނުގައި ހަރުލެއްވުމަށް ވަރަށް ކާމިޔާބު ކިޔެވުމުގެ ހުނަރެކެވެ. ޚާއްޞަކޮށް ބަޔޮލޮޖީފަދަ ގިނަ ކޮންސެޕްޓް ތަކެއް ހަނދާނުގައި ހަރުލައްވާން ޖެހޭ މާއްދާ އަކަށް މި އުކުޅުތައް ވަރަށް އެހީތެރިވެ ދޭނެއެވެ. (ޕުޓްނަމް،2015). އެގޮތުން މ.ސ.ޒ. ގްރެންއާއި ކިންގްފިލިޕްގެ ސޫޕްގެ ވާހަކަ އަކީ އޭގެ ވަރަށް ރަނގަޅު މިސާލެކެވެ. އަމިއްލަޔަށް ނެމޮނިކްސް އާއި އެކްރޮނިމްސް ތައްޔާރުކޮށްލުމުން ގިނަދުވަހަށް ހަނދާނުގައި ހުންނާނެއެވެ.

ވާރޗުއަލް ލެބްގެ ބޭނުން ކުރާށެވެ.

ޓެކްނޮލޮޖީއަކީ ކުދީން ވަރަށް ގަޔާވާ މިތުރެކެވެ. ކިޔެވުމަށްޓަކައި މަދަދުވެރިއެއްގެ ގޮތުގައި އެ ވަޞީލަތުގެ ބޭނުން ހިފާށެވެ.  އޭޓީޕީ ޕޭޕަރަށް ތައްޔާރު ވުމަށް ވަރޗުއަލްލެބަކީ މަޢުލޫމާތުގެ ފުންކަނޑެކެވެ. ހެޔޮގޮތުގައި ބޭނުން ކުރާން އާދަކުރާށެވެ. އެކްސްޕެރިމެންޓުތައް ދޭތެރެ ދޭތެރެއިން ބަލައިލުމަކީ ކުރެވިދާނެ ކަމެކެވެ.

ބަޔާންވެދިޔަ ކަންކަމުގެ އިތުރުން ވެސް، ކިޔަވާކުއްޖަކު ކޮންމެހެން ކުރާންޖެހޭ މުހިންމު ކަންތައްތަކަށް އަހުލުވެރިވާށެވެ. އެގޮތުން ކުލާހުގައި ކަނުލާ އަޑުއެހުމާ، ފޮތްކިޔުމާ، ނޯޓްހެދުމާ، އަދި ދުވަހުން ދުވަހަށް މަސައްކަތް ނިންމަމުން ދިއުމަކީ ކާމިޔާބު ކުދީން ގަޔާވެ އެކަމުގައި ސާބިތުވެ ތިބޭ ކަންކަމެވެ. ނަމާދަށް ރައްކާތެރިވުމާއެކު ކާމިޔާބީ ދެއްވުން އެދި ދުޢާ ކުރާށެވެ.

ބަޔޮލޮޖީ ކިޔެވުމަށްޓަކައި ދެފައިން އެއްފަހަރާ ފުންމައިލުން ވަރަށްމުހިންމެވެ. އެއް ފައި އެތެރޭގައި  އަނެއް ފައި ބޭރުގައި ވީމާ މިކަން އެންމެ ރަނގަޅަށް ނުކުރެވިދާނެއެވެ.