މާލޭ ސިޓީގެ ސްކޫލުތައް ކުރިޔަށް އޮތް ދެ ހަފުތާއަށް ބަންދުކޮށް އޮންލައިންކޮށް ކިޔަވައިދޭ ގޮތަށް އެޑިޔުކޭޝަން މިނިސްޓްރީން ނިންމަވައިފިއެވެ.

އެޑިޔުކޭޝަން މިނިސްޓްރީން މިއަދު އާންމު ކުރެއްވި ބަޔާނުގައިވަނީ މިގޮތަށް ނިންމެވީ، ކޮވިޑް-19ގެ މިހާރުގެ ޙާލަތަށް ރިޢާޔަތްކޮށް، އެޗް.ޕީ.އޭ އާއި ކަމާބެހޭ ފަރާތްތަކުގެ ލަފާގެ މަތިން، ކަމަށެވެ. އެހެންކަމުން ސެޕްޓެމްބަރ 6 ން 17 އަށް މާލޭ ސިޓީގެ ސްކޫލުތަކުގައި ކިޔަވައެއް ނުދޭނެއެވެ.

ކޮވިޑް-19ގެ މި ޙާލަތުގައިވެސް އެޑިޔުކޭޝަން މިނިސްޓްރީގެ އެންމެ މުހިންމު އަމާޒަކީ ދަރިވަރުންގެ ކިޔެވުން މެދުނުކެނޑި ކުރިޔަށް ގެންދެވުން ކަމަށާއި އެހެންކަމުން އެ މުއްދަތުގައި ދަރިވަރުންނަށް ކިޔަވައި ދެމުން ގެންދަވާނީ އޮންލައިންކޮށް ކަމަށް މިނިސްޓްރީގެ ބަޔާނުގައި ފާހަގަ ކުރައްވައިފައިވެއެވެ.

ކޮވިޑް-19 އާ ގުޅިގެން މާލޭ ސިޓީގެ ސްކޫލުތައް ބަންދުވީ ނަމަވެސް، އޭލެވެލް އަށް ކިޔަވައި ދަރިވަރުންގެ އިމްތިޙާނު އަންނަ މަހު ފެށޭތީ  ހަޔަރ ސެކަންޑަރީގެ ދަރިވަރުންގެ ކިޔެވުން ކުރިޔަށް ގެންދާ ގޮތަށް އެޑިޔުކޭޝަން މިނިސްޓްރީ ވަނީ ނިންމަވާފައެވެ.