މިޒަމާނަކީ ޢިލްމާނުލައި ހަމަ އެއް ކަމެއްވެސް ކުރެވެން ނެތް ޒަމާނެކެވެ. ދުނިޔޭގެ ޤައުމުތަކުން މިއަދު އަމާޒު ހިފައިފާ ހުރީ ޕްރޮޑަކްޓިވް އިކޮނޮމީއެއްގެ ބަދަލުގައި ނޮލެޖްބޭސްޑް އިކޮނޮމީއަކާ ދިމާއަށެވެ. މިކަން އެންމެ ރަނގަޅަށް ކުރެވޭނެ ހަމައެކަނި ތަނަކީ ސްކޫލުތަކެވެ. ސްކޫލުތަކުން މިކަން ކުރެވޭނީ އެ ތަންތަން ހުޅުވި ދަރިވަރުންނަށް ބޭނުންވާ ޢިލްމާއި ހުނަރާއި ޤާބިލިއްޔަތު އޭގެ އެންމެ އެދެވޭ ގޮތުގައި ދެވިގެންނެވެ. އެހެންނަމަވެސް ކޮވިޑް-19ގެ ސަބަބުން ދަރިވަރުންނަށް މިވަނީ އެތައް މަހެއް ވަންދެން ސްކޫލުތަކާ ދުރުގައި ތިބޭން މަޖުބޫރުވެފައެވެ.
އދ. ގެ ސެކްރެޓަރީ ޖެނެރަލް އެންޓޯނިއޯ ބްޓަރޭޒް ސިފަކުރައްވާ ގޮތުގައި، ދުނިޔޭގެ ތާރީޚުގައި ތަޢުލީމީ ދާއިރާއަށް މިހާތަނަށް ލިބުނު އެންމެ ބޮޑު ގެއްލުމަކީ، ކޮވިޑް-19ގެ ސަބަބުން ލިބެމުންމިދާ ގެއްލުންތަކެވެ. މި ގެއްލުންތައް އިތުރުވަނީ ދަރިވަރުންނަށް ސްކޫލަށް ނުދެވޭތީއެވެ. އެހެންކަމުން ސްކޫލްތަކަށް، ކިޔަވާން ދަރިވަރުންނަށް ނުދެވުމަކީ އޭގެ ގެއްލުން ބުނެދެވޭ ވަރަށްވުރެ މާ ބޮޑު ކަމެކެވެ.
އުނގެނުމުގައި އެންމެ ފައިދާބޮޑީ ސްކޫލުތަކަށް ގޮސްގެން ކިޔެވުމެވެ. އެހެނީ ސްކޫލުތަކުން ދަރިވަރުންނަށް ދަސްކޮށްދެނީ ހަމައެކަނި ފޮތުގެ ދެލިގަނޑު ކަމަށް ނުވާތީއެވެ. މިގޮތުން ޢިޖުތިމާޢީ، ޖިސްމާނީ، ޞިއްޙީ، ނަފުސާނީ އަދި ރޫހާނީ އެތައް ޤާބިލިއްޔަތަކީ ސްކޫލުތަކުން ދަރިވަރުން ފޯރުކޮށްދޭ ކަންކަމެވެ.
އުނގެނުމަކީ ވަރަށް ބޮޑު ޢިޖުތިމާޢީ ކަމެކެވެ. އެހެން ކުދީންނާއެކު ކުލާހުގައި ކުރެވޭ މަސައްކަތްތަކުންނާއި، ދެކެވޭ ވާހަކަތަކުންނާއި، ބަދަހިވެގެންދާ ގުޅުންތައް ހުއްޓުމަކަށް އައުމަކީ، ދަރިވަރުންނަށް ވަރަށް ބޮޑެތި ނޭދެވޭ އަސަރުތަކެއް އެކަމުން ކުރާނެ ކަމެކެވެ. ސްކޫލުތަކަށް ދިއުމުން ދަރިވަރުންގެ އިޖްތިމާޢީ، ޖިސްމާނީ،ޞިއްޙީ، ނަފްސާނީ، އަދި ރޫޙާނީ އެތައް ޤާބިލިއްޔަތެއް ކުރިއަރާ ތަރައްޤީވެއެވެ. މިހެންވަނީ ސްކޫލުތަކަކީ މިދެންނެވި ޤާބިލިއްޔަތުތައް ދަރިވަރުންނަށް ލިއްބައިދެވޭނެ ގޮތަށް ކަންކަން ރޭވި، ޕްލޭނު ކުރެވި އެކަމަށް މަސައްކަތް ކުރެވޭ ހަމައެކަނި ތަންތަން ކަމަށް ވީތީއެވެ.
ހެލްތް އިމަރޖެންސީ އޮޕަރޭޝަން ސެންޓަރުގެ ފަރާތުން ރޭ ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެޑިޔުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވީ، މިހާރު މަސައްކަތް ކުރައްވަމުން ގެންދަވަނީ، އައު އާންމު ޙާލަތަކުން، އާންމު ޙާލަތަކަށް ދިއުމަށް ކަމަށެވެ.
އަންނަ ހަފުތާގެ އާދީއްތަ ދުވަހު ސްކޫލުތަކުގެ ކިޔެވުން އަލުން ފެށޭނެއެވެ. މާލޭ ސަރަޙައްދުގެ ސްކޫލުތަކުގައި ކިޔަވައި ދެވޭނީ ޖުލައި 1 ގައި ސްކޫލުތައް ހުޅުވުނު އިރު ކިޔެވުން ކުރިޔަށް ގެންދެވުނު ގޮތަށެވެ. މިގޮތުން މާލޭ ސަރަޙައްދުގެ ސްކޫލުތަކުގައި ކިޔަވައިދިނުން ކުރިޔަށް ދާނީ 4 ގަޑިއިރަށް، ގްރޭޑް 9 ން މައްޗަށެވެ. އަތޮޅުތަކުގެ ސްކޫލުތަކުގައި ކިޔެވުން ކުރިޔަށް ދާނީ 5 ގަޑިއިރަށް ގްރޭޑް 1 ން ފެށިގެން މަތީގެ ގްރޭޑު ތަކަށެވެ.
ސްކޫލުތައް ހުޅުވުމަކީ ދަރިވަރުންގެ ދިރިއުޅުން، އާންމު ޙާލަތަކަށް ގެނައުމަށް އެޅޭ ވަރަށް މުހިންމު ފިޔަވަޅެކެވެ. މިކަމުގެ ސަބަބުން ކުދީންނަށް ލިބިފައިވާ ހާސްކަންފިލައި ހިތްހަމަޖެހުން އިތުރުވެގެން ދާނެއެވެ. އަދި ކިޔެވުމުގައި އެކުދީން ބައިވެރިވާ މިންވަރު ވެސް، އިތުރުވެގެން ދާނެއެވެ. މީގެ ނަތީޖާއަކަށް ވެގެންދަނީ އެ ކުދީންނަށް ދެވޭ ފިލާވަޅުތައް ފަހުމުވުމަށް ފަސޭހަވެ، އުނގެނުމުގެ ހުނަރު މިހާރަށްވުރެ މަތީ ހަރުފަތަކަށް ދިއުމުގެ މަގުފަހިވެގެން ދިއުމެވެ. މީގެ ސަބަބުން ދަރިވަރުންގެ އިތުރުން، ދަރިވަރުންނަށް ބޭނުންވާ އިތުރު އެހީތެރިކަން ފޯރުކޮށް ދިނުމަށް މުދައްރިސުންނަށް ވެސް ފަސޭހަވެގެން ދާނެއެވެ.
އަންނަ އާދީއްތަ ދުވަހު ސްކޫލުތައް އަނެއްކާވެސް ހުޅުވޭއިރު ދަރިވަރުންގެ ކިޔެވުން ކުރިޔަށްދާނީ ކުރީން ކިޔެވި ގޮތްތަކާ މުޅީން ތަފާތު ގޮތަކަށެވެ. ކްލާހެއްގައި ތިބޭނީ 30 ކުދީންގެ ބަދަލުގައި 15 ނުވަތަ 16 ދަރިވަރުންނެވެ. މިގޮތަށް މިކަންކަން އިންތިޒާމުވެފައިވުމުން ކުރިޔާ ޚިލާފަށް މި ޙާލަތުގައި ކުރިޔަށް މިގެންދެވޭ ކިޔަވައި ދިނުން ވަރަށް އުފެއްދުންތެރިވާނެ ކަމަށް ޤަބޫލު ކުރެވެއެވެ.
ދަރިވަރުންގެ ޢަދަދު ކުލާހުގައި މަދުވުމަކީ ޓީޗަރަށް ބުރަބޮޑުވާނެ ކަމަކަށް ވީ ނަމަވެސް ދަރިވަރުންނަށް މިކަމުން ލިބޭނެ އަނެއް ފައިދާއަކީ، ކުރީން ސުވާލު ކުރުމުގެ ފުރުޞަތު ނުލިބޭ ދަރިވަރުންނަށް ވެސް، ސުވާލު ކުރުމުގެ ފުރުޞަތު ފަހިވެގެން ދިއުމާއި ޓީޗަރަށް ވެސް ކުދީންނާ ސުވާލު ކުރުމަށާއި ދަރިވަރުންނަށް އެހީތެރިވެ ދިނުމަށް ވަގުތު ލިބި، ދަރިވަރުން ބޭނުންވާ ގޮތަށް ކިޔަވައި ދިނުމުގެ ފުރުޞަތު ލިބިގެން ދިއުމެވެ. އެހެންކަމުން 21 ވަނަ ގަރުނަށް ލޯހުޅުވިފައިވާ ޖީލެއް ބިނާ ކުރުމަށް ސްކޫލުތައް ހުޅުވުމަކީ ވަރަށް މުހިންމު ކަމެކެވެ.
ކޮވިޑް-19ގެ އާލަމީ މި ވަބާ ދުނިޔެއާ ކުރިމަތިވިއިރު، އެއްވެސް ޤައުމެއް އޮތީ މިފަދަ ކަމަކަށް ތައްޔާރަކަށް ނޫނެވެ. އެހެންކަމުން މިފަދަ ޙާލަތެއްގައި އޮންލައިން މަންސައެއްގެ ތެރެއިން އުނގެނުމުގެ ކަންކަން ކުރިޔަށް ގެންދާނެ ގޮތުގެ ތަމްރީނުތަކެއް ޓީޗަރުންނަކަށް ވެސް، ދަރިވަރުންނަކަށް ވެސް، އަދި ބެލެނިވެރީންނަކަށް ވެސް ލިބިފައެއް ނުވެއެވެ. ދެންއޮތީ އޮންލައިންކޮށް ކިޔަވައި ދިނުމަށް ބޭނުންވާ އިންޓަރނެޓުގެ ވާހަކައެވެ. އިންޓަރނެޓުގެ ސްޕީޑު ނުލިބުމާއި ލިބޭ ޑާޓާކޮޅުން ނުވުމާއި މިފަދަ އެތައް އެތައް ކަމެއް ދަރިވަރުންނާއި ޓީޗަރުން މިހާރުވެސް ދަނީ ތަހަންމަލް ކުރަމުންނެވެ. އެޑިޔުކޭޝަން މިނިސްޓްރީން އާންމު ކުރައްވައިފައިވާ ގޮތުގައި 15000 ދަރިވަރުންނަށް އިންޓަރނެޓުގެ ޚިދުމަތެއް ނުލިބެއެވެ. މިކަމަށް ހައްލެއް ހޯދައި ދެއްވުމަށް އެ މިނިސްޓްރީން ގެންދަވަނީ ހުއްޓުމެއްނެތި މަސައްކަތްތަކެއް ކުރައްވަމުންނެވެ. އެހެންކަމުން މިހުރިހާ ސަބަބުތަކެއް މިހެން ހުރުމާއެކު ދަރިވަރުންގެ އުނގެނުމަށް އެންމެ ފައިދާ ބޮޑު ގޮތަކަށްވާނީ، ސްކޫލުތައް ހުޅުވައިލުމާއެކު އުފަލުން ސްކޫލަށް ދިއުމެވެ.
ސްކޫލުތަކުގައި ރައްކާތެރިކަމުގެ ފިޔަވަޅުތައްވަނީ ކަށަވަރު ކޮށްދެވިފައެވެ. ބައިނަލް އަޤުވާމީ މިންގަޑުތަކަށް ކަންކަންވަނީ ރޭވި އިންތިޒާމު ކުރެވިފައެވެ. ސްކޫލުތަކަކީ އެންމެ ރައްކާތެރި އެއްތަން ކަމަށް އެޗްޕީއޭއިން އެތައް ފަހަރަކުވަނީ ފާހަގަ ކުރައްވައިފައެވެ. އެޗްއީއޯސީން ރޭ ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާން ޑރ. ފާތުމަތު ނަޒްލާ ރަފީޤު ވަނީ އެވާހަކަފުޅު އަނެއްކާވެސް ތަކުރާރު ކުރައްވައިފައެވެ. އެޑިޔުކޭޝަން މިނިސްޓަރ ޑރ. ޢާއިޝަތު ޢަލީ ވިދާޅުވަނީ ސްކޫލުތަކުން އެންމެ އިސްކަމެއް ދެއްވަނީ ދަރިވަރުގެން ރައްކާތެރި ކަމަށް ކަމަށެވެ. މިހާތަނަށް ސްކޫލަކުން ކޮވިޑް-19 ފެނިފައި ނުވުމަކީ، ސްކޫލުތަކުގައި އެޅިފައި ހުރި ރައްކާތެރިކަމުގެ ފިޔަވަޅުތަކުގެ ހަރުދަނާކަން ހާމަކޮށްދޭ ކަމެކެވެ.
ދަރިވަރުން ސްކޫލަށް ފޮނުވާން ފަސްޖެހޭންވީ އެއްވެސް ސަބަބެއްނެތެވެ. އެއަށްވުރެ ސްކޫލުތަކުގައި އެޅިފައި ހުރި ރައްކާތެރިކަމުގެ ފިޔަވަޅުތައް މާ ފުރިހަމައެވެ. ސްކޫލަށް ނުދެވުމުން ދަރިވަރަށް ލިބޭ ގެއްލުމަކީ ބުނެދެވޭނެ އެއްޗެއްނޫނެވެ. އެހެންކަމުން ލިބޭ ފުރުޞަތު ނަގައި ނުލާ ހުރިހާ ކުދީން އަވަހަށް އުފަލުން ސްކޫލަށް ދާށެވެ. ތިމާގެ މުސްތަޤުބަލަށް ތިމާ ކުރާ ކަމެއްގެ ގޮތުގައި ދެކިގެންނެވެ.
advertisment
advertisment
advertisment
30 Responses
ވަރަށް ރަނގަޅު ލިޔުމެއް. ދަރިވަރުން ސްކޫލާ ދުރުގައި ތިބޭންޖެހުމުން އެކުދީންނަށް ވަރަށް ބޮޑަށް ނަފުސާނީ ޖިސްމާނީ، އަދި ސިއްހީ ގޮތުންވެސް ގިނަ އަސަރުތަކެއް ކުރާނެ. ވީހާވެސް އަވަހަކަށް ސްކޫލަށް އާދެވި ދަރިވަރުންނާ ދިމާވެ ޓީޗަރުންނާ ބައްދަލުވުމަކީ މިކަމަށް އޮތް ވަރަށްބޮޑު ހައްލެެއް
ވަރަށް ރަނގަޅު ލިޔުމެއް. ދަރިވަރުން އަވަހަށް ސްކޫލަށް ފޮނުވުން މުހިންމު. ގޭގައި އިންނަންޖެހުމުން އަޅުގަނޑުގެ ދަރިފުޅަށް ވަރަށް ބޮޑަށް ބަދަލު އަތުވެއްޖެ
ދަރިފުޅަށް ވަރަށް ބޮޑަށް ބަަދަލު އަތުވެއްޖެ. ވީހާވެސް އަވަހަކަށް ސްކޫލަށް ފޮނުވަން އަޅުގަނޑު ބޭނުން. ސްކޫލުގެ މުހިންމުކަން މިކަހަލަ ކަމަކުން މިއެނގުނީ
ވަރަށް ރަނގަޅު ލިޔުމެއް. ސްކޫލުތަކުގެ ބޭނުންތެރިކަމާއި ޓީޗަރުން ކޮށްދެއްވާ މަސައްކަތުގެ މުހިންމުކަން އަދި ކިރިޔާ މިފާހަގަ ކުރެވުނީ. އަޅުގަނޑުގެ ދަރިފުޅު ސްކޫލަށް ފޮނުވާނަން
ކުދީން މަދުވީމާ ޓީޗަރުންނަށް ވާނީ ފަސޭހައެއްނޫންބާ. ކީއްވެބާ ޓީޗަރުންނަށް ބުރަބޮޑުވަނީ. މިދައްކަނީ ދެކޮޅު ޖެހޭ ވާހަކައެއްތަ!
ކުރިން ކުހެއްގައި 30 ވަރަކަށް ކުދިން ތިބޭނެ. މިހާރު ކުލާހަކަށް 15 ކުދިން ލާގެން 2 ކުލާޙަށް ހެދީ. އެހެންވީމާ ކުރިން 5 ކުލާސް ނަގައިދޭ ޓީޗަރު މިހާރު 10 ކުލާސް ނަގައިދޭނެ ނޫންތޯ. ކުލާސްތައް ކޮންމެ ކުލާހެއް ދެކުލާހަކަށް ހެދި ނަމަވެސް އިތުރު ޓީޗަރުނެއް ނުނަގައެއްނޫންތޯ. އަޅުގަނޑަށް ވިސްނެނީ ލިޔުންތެރިޔާ ޓީޗަރުންނަށް ބުރަ ބޮޑުވާނެ ކަމަށް އެ އިޝާރާތް ކުރަނީ އެހެންވެގެންހެން. ނުސީދާ ގޮތަކަށް އެވާހަކަ ލިޔުމުގައި ބުނެދީފައިވެސް އެބަވޭ. އަދި ވިސްނާލުން ކިހިނެއްވާނެތޯ
ތާއީދު. ވަރަށް ރަނގަޅު ވާހަކައެއް.
ސްކޫލުތައް ނުހުޅުވާ ލަސްކުރަންވީ ކީއްވެތޯ. ޚާއްޞަކޮށް އަތޮޅުތެރޭގެ ސްކޫލުތައް. ދަރިވަރުންނަށް ބޮޑެތި ގެއްލުންތެކެއް ލިބޭކަން އެގިތިބެ
ސްކޫލުތަކުގައި ރައްކާތެރިކަމުގެ ފިޔަވަޅު އެޅިފަ ވެޔޭ ބުންޏަސް އެއީ ހަމަ ބުނާ ބަހެއް. މިހާރު އަތްދޮވެލާނެ ފަދަވެސް އެތަންތަނަކު ނުހުންނާނެ. އެއީ ކުރީގައި ހިލޭ ބެހި ސާމާނު.
ކިހާވަރަކަށް ބަލާފަތޯ ތިހެން ތިބުނުއްވަނީ. ސްކޫލުތަކަށްވުރެ ރައްކާތެރި ފިޔަވަޅުތައް އެޅިފައިވާ އެހެންތަނެއް އެބަހުރިތޯ. އަވަހަށް ކިޔަވައިދޭން ފަށަންވީ
ސްކޫލަށް ނުދެވި މިހާގިނަ ދުވަހު އަޅުގަނޑުގެ ދަރިފުޅު ގޭގައި ހުރީމަ މިއެނގެނީ ސްކޫލުގެ މުހިންމުކަން. ކުޑަކުދިން ވާހަކަ ނުދެއްކީމަ ޑރ. އައް ދެއްކީމާވެސް ބުނުއްވާ ސްކޫލަކަށް ވައްދާށޭ. ސްކޫލުގެ މުހިންުމުކަން ޓީޗަރުންގެ މުހިންމުކަން އަދި މިވިސްނުނީ.
ވަރަށް ރަނގަޅު ލިޔުމެއް. މިހާލަތައް ވަރަށް މުނާސަބު ލިޔުމެއް. ލިޔުންތެރިންގެ ވާޖިބަކީ މީހުން ހޭލުންތެރި ކުރުވުން
ޢިލްމަކީ ގަދަބާރުން ހޯދާދެވޭނެ އެއްޗެއްނޫން. އެމީހަކު އަމިއްލަކަމެއްގެ ގޮތުގައި ދެކިގެން ކުރީމާ ކުރެވޭނެ ކަމެއް އެއީ. އެހެންވީމާ މިފަދަ ނުރައްކާތެރި ހާލަތެއްގައި ސްކޫލަށް ދާކަށް އެއްބަހެއް ނުވެވޭނެ.
ތިޔައީ އަދި އެންމެ ރަނގަޅު ގޮތެއްނޫން. އަދިވސްނާލުން ރަނގަޅުކަމަށް ފެންނަނީ. ސްކޫލާ ނުލާ ކިޔެވުން ފުރިހަމައެއް ނުވާނެ
އެއް ގޮތަކަށް ސްކޫލަށް ނުދާ މީހުންވެއސް ބޮޑެތި އިންޖިނޭރުންނަށް ވެފަވެސް އެބަހުރި. އެހެންވީމާ މިކަހަލަ ހާލަތެއްގައި ސްކޫލަށް ދިއުން ބުއްދިވެރިއެއްނޫން. ސްކޫލެއްގެ ތެރެއަށް ކޮވިޑް ފެތުރިއްޖެނަމަ އެތައް ސަތޭކަ ކުދިބަޔަކާއި އެތައް އާންމުންނަކަށް މިބަލި ޖެހުމުގެ ރިސްކު އެބައޮތް
ހައްތަހާވެސް ނަމަ. ނަމަވީމާ ހަމަ އަންނާނީ ނަމަ. ނަމާގަ ކެނޭނެ ރިހައެއް ނޯންވޭ. ތީ ހަމަ ހުސް ހޯޅި ވާހަކަ
މިހާލަތާ ގުޅޭ ވަރަށް ރަނގަޅު ލިޔުމެއް
ދަރިވަރުން އަވަހަށް ސްކޫލަށް ފޮނުވުން އެންމެ ބުއްދިވެރި ގޮތަކީ
ސްކޫލުތައް ނުހުޅުވާނަމަ ދަރިވަރުންނަށް ހަމަ ހަގީގަތުގައިވެސް ގެއްލުން ލިބޭނެ
ކުރީ ފަހަރުވެސް ސްކޫލު ހުޅުވުނު އިރު ކުދިން ދިޔަ. އެކަމަކު ފަހުންފަހުން ކުދިން މަދުވަމުން މަދުވަމުން ގޮސް ގްރޭޑް 7، 8 ގެ ކުދިން ގެންނަން އުޅެނިކޮށް އަނެއް ކާވެސް ސްކޫލު ބަންދުވީ
މިލިޔުމުގައި މިވަނީ ވަރަށް ރަނގަޅު ވާހަކައެއް. ޢިލްމާނުލާ މިއަދު ހަމަ އެއްކަމެއްވެސް ނުވާނެ. ހުރިހާ ފިލާވަޅެއް ހުންނާނީ ގުޅިލާމެހިފަ. އެހެންވީމާ، ނިކިޔެވިދާ ކޮންމެ ދުވަހކީ ބޮޑު ގެއްލުމެއް ލިބޭނެ ދުވަހެއް
ލިޔުމުގައިވާ ވާހަކަ ގޯހެއް ނޫން. އެކަމަކު ރާއްޖޭގައި މިކިޔަވައިދެނީ ނަމެއްގައި. ސަރުކާރު ސްކޫލުތަކުގައި ނިކަމެތިންގެދަރިން. ފައިސާވެރިންގެ ދަރިންތިބީ ކޮންތަންތނެއްގާތޯ ބަލާބަލަ.
ރާއްޖޭގައި މިދެނީ ތައުލީމުތޯ ނޫނީ ތައުލީމުން ވައްކަން ކުރަނތީ ނޫންބާވައޭ ބައެއް ފަހަރު ހިތައް އަރާ
ސްކޫލުތަކުން މަސައްކަތް ކުރަނީ ދަރިވަރުން ގާބިލު ބަޔަކަށް ހަދަންބާ. ނުވަތަ ކުދިންގެ ކިބައިގާ ހުންނަ ގާބިލުކަން ނައްތާލަންބާ.
ސްކޫލުތަކުގައި ތިބި ޓީޗަރުންގެ ފެންވަރާމެދު ސުވާލު އުފެދޭ. ފެންވަރުނެތް ބަޔަކުތިބި ތަނަކުން ކޮން ގާބިލު ޖީލެއްތަ ބިނާ ކުރެވޭނީ. މަދަރިފުޅު ތިއިން ސްކޫލަކަށް ނުވައްދާނަން. ތިތަންތަނުގެ ހާލަތު މަށަކު މާބޮޑަށްވެސް އެގޭ
މިދުވަސްކޮޅު ސްކޫލުތަކަށް ދަރިވަރުން ގޮސްގެން ފައިދާ ކުރާނެ ކަމަކަށް ނުފެނޭ. މިއުޅެނީ ގޭމެއް ކުޅެން
ކޮވިޑޭ ކިޔާގެން އަތޮޅުތެރޭ ސްކޫލުތައް ބަންދު ކުރީ ކީއްވެތޯ ސުވާލު ކުރަންޖެހޭ. މަޖިލީހަށް މިނިސްޓަރު ހާޒިރުކޮށް ޒިންމާދާރު ކުރުވަންޖެހޭ.
ގައްދޫއަށް ތާޢީދު. ސްކޫލުތައް ބަންދު ކުރުމަކީ ދަރިވަރުންނަށް ލިބޭ ގެއްލުން އިއާދަ ނުކުރެވޭ ވަރުގެ ކަމަކަށް ވާއިރު، އަތޮޅުތެރޭގެ ރަށްރަށުގައި ކޮވިޑުނެތި އެ ރަށްރަށުގެ ކުދިންގެ ކިޔެވުން ބްރޭކު ކޮށްލި ކޮށްލުމަކީ ބަލައިގަނެވޭ ކަމެއްނޫން. މިނިސްޓަރ މަޖިލީހަށް ހާޒިރުކޮށް މައްސަލަ ބަލަންޖެހޭ. ދިވެހިގައުމުގެ އެތައް ހާސް ކުދިންނެއްގެ ކިޔެވުމަށް ހުރަސް އަޅައިފައިވާތީ
ސުކޫލުތަކުން ދަރިވަރުންނަށް ތަޢުލީމު ދެވޭތޯ ޓީޗަރުން އެކުރާ މަސައްކަތަށް ސާބަސް. ތިބޭފުޅުންގެ ޚިދުމަތުގެ އަގު ވަޒަން ކުރެވުނީ ކޮވިޑާ ގުޅިގެން ތި ވަމުންދާ ގުރުބާނީން. އަޅުގަޑުގެ ދަރިފުޅަށް އައި ބަދަލު އަޅުގަނޑަށް އެނގޭ. ސްކޫލަށް އުފަލުން ދަރިފުޅު ފޮނުވަން މިހުރީ ކެތްމަދުވެފަ
ސްކޫލުތައް މުހިންމު ވާތީ މިހާބޮޑު ހޭދައެއް ދައުލަތުން މިކުރަނީ. އެކިމީހުންގެ ޖީބަށް