އެޑެކްސެލް އިންޓަރނޭޝަނަލް އޭލެވެލް އިމްތިޙާނުގެ ސުވާލު ކަރުދާސް، އިމްތިޙާނު ހަދާ ހުރިހައި ސެންޓަރުތަކަކަށް ޙަވާލުކޮށް ނިމިފައިވާ ކަމަށް ޑިޕާރޓުމަންޓް އޮފް ޕަބްލިކް އެގްޒަރމިނޭޝަންސް އިން މަޢުލޫމާތު ދެއްވައިފިއެވެ.

އެ ޑިޕާޓުމަންޓުގެ އިސް އޮފިޝަލަކު ވިދާޅުވީ، މި އަހަރު އޭލެވެލް އިމްތިޙާނު ހެދުމަށް ހަމަޖެހިފައިވާ އަތޮޅުތެރޭގެ 33 ސެންޓަރަށް ސުވާލު ކަރުދާސް މިހާރު ހަވާލު ކުރެވިފައި ވާހަކަމަށެވެ.

އެޑެކްސެން އޭލެވެލް އިމްތިޙާނަކީ، މެއި/ ޖޫން ގައި އޮންނަ އިމްތިޙާނެކެވެ. އެހެންނަމަވެސް ކޮވިޑް-19އިން ރައްކާތެރި ވުމަށް ސަރުކާރުން އަޅުއްވަމުން ގެންދެވި ފިޔަވަޅުތަކާ ގުޅިގެން ސްކޫލުތައް ދިގު މުއްދަތަކަށް ބަންދު ކުރާންޖެހުމާއެކު، މި އަހަރުގެ މެއި/ ޖޫންގައި ބޭއްވުމަށް ހަމަޖެހިފައި އޮތް އެޑެކްސެލް އިންޓަރނޭޝަނަލް އޭލެވެލް އިމްތިޙާނު މިއަހަރުގެ އޮކްޓޯބަރ/ނޮވެމްބަރގައި ބާއްވާ ގޮތަށް ވަނީ ފަސްކުރެވިފައެވެ.

މިހާރު ހަމަޖެހިފައިވާ ގޮތުން އެޑެކްސެލް އޭލެވެލް އިމްތިޙާނު ފެށުމަށް ހަމަޖެހިފައިވަނީ މި މަހުގެ 5 ވާ ހޯމަ ދުވަހުއެވެ. ނިމޭނީ އޮކްޓޯވަރ 28 ގައެވެ. އެޑެކްސެލް އޭލެވެލް އިމްތިޙާނުގައި، 1528 ދަރިވަރުން ބައިވެރިވާނެއެވެ. އެއީ އަތޮޅުތެރޭގެ 33 ސެންޓަރަކުން ބައިވެރިވާ 460 ދަރިވަރަކާއި މާލޭގެ 4 ސެންޓަރަކުން ބައިވެރިވާ 1068 ދަރިވަރުންނެވެ. މާލޭގެ 4 ސެންޓަރުގެ ތެރޭގައި ހިމެނެނީ ސީއެޗްއެސްއީ އާއި، ވިލާ ހައިސްކޫލާއި، އަޙުމަދިއްޔާ އިންޓަރނޭޝަނަލް ސްކޫލާއި، ޑީ.ޕީ ޕްރައިވެޓް އެވެ.