ދެހާސް ވިހިވަނަ އަހަރުގެ ދެވަނަ ޓާރމުގައި (2021 ވަނަ އަހަރުގެ ޖަނަވަރީ 10 ން 2021 ޖޫން 24 ށް) ސްކޫލުތަކުގައި އިތުރު ޙަރަކާތްތައް ކުރިޔަށް ގެންދާނެ ގޮތުގެ އުޞޫލެއް މިނިސްޓްރީ އޮފް އެޑިޔުކޭޝަނުން އެކުލަވައިލައްވައި ސްކޫލުތަކަށް އެކަން އަންގަވައިފިއެވެ.
މައިގަނޑު 8 ނުކުތާއެއްގެ މައްޗަށް ބިނާވެގެންވާ މި އުޞޫލުގެ ދެވަނަ ނަންބަރުގައި ބުނެފައިވަނީ، މި އުޞޫލުގެ ދަށުން ހުއްދަ ކުރާ ޙަރަކާތްތައް ހިންގާއިރު، ކޮވިޑް-19 ގެ ބަލިމަޑުކަމާ ގުޅިގެން ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ) ގެ އިރުޝާދަށާއި މިނިސްޓްރީ އޮފް އެޑިޔުކޭޝަނުން އާންމު ކޮށްފައިވާ އުޞޫލުތަކާ އެއްގޮތަށް ޢަމަލު ކުރާންވާނެ ކަމަށެވެ.
މިނިސްޓްރީ އޮފް އެޑިޔުކޭޝަނުން އެކުލަވައިލެއްވި މި އުޞޫލުގެ 3 ވަނަ ނަންބަރުގައި ބުނެފައި ވަނީ، ސްކޫލުތަކުން ބާއްވާ ހެނދުނުގެ ކަސްރަތު ޕްރޮގްރާމްތަކާއި، ސްކޫލުތަކުން އިންތިޒާމުކޮށްގެން އެ ސްކޫލެއްގެ ދަރިވަރުންނަށް ބާއްވާ ކުޅިވަރު ޙަރަކާތްތަކާއި، ތިންވަނަ ފަރާތެއްގެ އެހީއާއެކު، ސްކޫލުތެރޭގައި ބާއްވާ ކުޅިވަރު ޕްރެކްޓިސްތަކާއި، ޤައުމީ ކުޅިވަރު ބަލަހައްޓާ މުއައްސަސާއަކުން އެދިގެން ފޮނުވާ އެ، ކުޅިވަރެއްގެ ޕްރެކްޓިސްތައް ފަދަ ކުޅިވަރު ޙަރަކާތްތައް ސްކޫލުން އިންތިޒާމުކޮށް ކުރިޔަށް ގެންދެވިދާނެ ކަމަށެވެ.
އެޑިޔުކޭޝަން މިނިސްޓްރީން އެކުލަވައި ލެއްވި މި އުޞޫލުގައި ވާ ގޮތުން، ޤައުމީ ކުޅިވަރު ބަލަހައްޓާ މުއައްސަސާއަކުން އިންތިޒާމު ކޮށްގެން ކޮންމެ އަހަރަކު ވެސް، ސްކޫލް ދަރިވަރުންނަށް ބާއްވާ އިންޓަރ ސްކޫލް މުބާރާތްތަކެއް ދިރާސީ އަހަރުގެ ދެވަނަ ޓާރމުގެ ތެރޭގައި ކުރިޔަކަށް ނުގެންދަވާނެއެވެ. އެހެންނަމަވެސް އިންޓަރ ހައުސް އިންޓަރ ގްރޭޑް، އިންޓަރ ކުލާސް މުބާރާތްތައް މި އުޞޫލުގައި ވާ ގޮތުގެ މަތީން ސްކޫލުތަކުން ކުރިޔަށް ގެންދެވިދާނެއެވެ.
ދިރާސީ އަހަރުގެ ދެވަނަ ޓާރމުގެ ތެރޭގައި، ސްކޫލުތަކުން އިންތިޒާމުކޮށްގެން އެ ސްކޫލެއްގެ ދަރިވަރުންނަށް އިންޓެލެކްޗުއަލް އެންޑް ސޯޝަލް ޙަރަކާތްތަކުގެ ތެރެއިން ޤުރުއާން ޕޫލު ޙަރަކާތްތަކާއި، ޔުނީފޯމު ޙަރަކާތްތަކާއި، ކުރެހުމާއި ޑިޒައިން ކުރުމާއި އަތްތެރި މަސައްކަތުގެ ޙަރަކާތްތަކާއި، އަދަބީ ޙަރަކާތްތަކާއި، ސްކޫލް ކުލަބު ޙަރަކާތްތައް ކުރިޔަށް ގެންދެވިދާނެއެވެ. ސްކޫލުގެ ދަރިވަރުންނަށް އަމާޒު ކޮށްގެން ތިންވަނަ ފަރާތަކުން ބާއްވާ މިބާވަތުގެ ޙަރަކާތެއްގައި ދަރިވަރުން ބައިވެރި ކުރާން ވާނީ، އޮންލައިންކޮށް ކުރިޔަށް ގެންދާ މުބާރާތް ތަކުގައި ކަމަށް އެޑިޔުކޭޝަން މިނިސްޓްރީން އެކުލަވައިލި މި އުޞޫލުގައިވެއެވެ.
އެޑިޔުކޭޝަން މިނިސްޓްރީން އެކުލަވައި ލެއްވި މި އުޞޫލުގައި ބުނެފައި ވަނީ، ސްކޫލުން އިންތިޒާމު ކޮށްގެން އެ ސްކޫލެއްގެ ދަރިވަރުންނަށް ބާއްވާ ސިވިކް ވެލިއުސް ޙަރަކާތްތައް ކުރިޔަށް ގެންދެވިދާނެ ކަމަށާއި، މިބާވަތުގެ ޙަރަކާތެއް ތިންވަނަ ފަރާތަކާ ގުޅިގެން ކުރިޔަށް ގެންދިއުމަށް ރާވާނަމަ، އެފަދަ ޙަރަކާތްތައް ހިންގާން ވާނީ، މިނިސްޓްރީ އޮފް އެޑިޔުކޭޝަނުން ދޭ އިރުޝާދާ އެއްގޮތް ވާ ގޮތުގެ މަތީން ކަމަށެވެ.
އެޑިޔުކޭޝަން މިނިސްޓްރީން އެކުލަވައިލެއްވި މި އުޞޫލުގައި ވާގޮތުން ސްކޫލާއި މިނިސްޓްރީ އޮފް އެޑިޔުކޭޝަން ފިޔަވައި ތިންވަނަ ފަރާތަކުން ހިންގާ ފިޒިކަލް ނުވަތަ އޮންލައިން ޙަރަކާތެއްގައި ސްކޫލުތަކުން ބައިވެރިވާން ވާނީ، މިނިސްޓްރީ އޮފް އެޑިޔުކޭޝަންގެ ސްކޫލް އެޑްމިނިސްޓްރޭޝަން ޑިވިޜަންގެ ކޯކަރިކިއުލަރ ޔުނިޓުގެ ލަފާގެ މަތީންނެވެ.
advertisment
advertisment
advertisment