ލިޔުނީ: އަޝާ މުޙައްމަދު – އިސްކަންދަރު ސްކޫލް ގްރޭޑް:10

ދުނިޔެ ބަވަނަވުމުގެ ސަބަބުން، މިއަދު އިންސާނުން ވަނީ އެކިއެކި ރޮނގުތަކުން ކުރިއަރައި ގޮސްފައެވެ. އޭގެ ތެރެއިން އެންމެ ފާހަގަކުރެވޭ އެއް ދާއިރާއަކީ ދަތުރުފަތުރުކުރުމުގެ ދާއިރާއެވެ. މި ދާއިރާގައި އިންސާނުންނަށް ތަޢާރަފުވި، އަދި ތަޢާރަފުވަމުންދާ، އުޅަނދުތަކުގެ ސަބަބުން، މިއަދު އަޅުގަނޑުމެންނަށް ވަނީ އެތައް ލުއިފަސޭހަތަކެއް ލިބިފައެވެ. އެހެންނަމަވެސް، ދަތުރުފަތުރުކުރުމަށް ބޭނުންކުރާ މިފަދަ އުޅަނދުތަކުން އަޅުގަނޑުމެންނަށާއި، އަޅުގަނޑުމެންގެ ވަށައިގެންވާ ދުނިޔެއަށް ވެސް ތަފާތު ގޮންޖެހުންތައް ކުރިމަތިވެއެވެ. ވީމާ، ދަތުރުފަތުރުކުރުމުގައި ބޭނުންކުރެވޭ ޒަމާނީ އުޅަނދުތަކުން އިންސާނުންނަށް ފައިދާވި ނަމަވެސް އެއިން ލިބޭ ގެއްލުންތައް ވެސް މަދެއް ނޫނެވެ.

އެއް ތަނުން އަނެއް ތަނަށް ދަތުރުކުރުމަށް ބޭނުންކުރާ ޒަމާނީ އުޅަނދުތަކުގެ ސަބަބުން، އެ ފަދަ ދަތުރުތައް ކުރުމަށް ހޭދަކުރާ ވަގުތު މަދުވެއެވެ. އެ ގޮތުން، އިހުޒަމާނުގައި ރާއްޖެތެރޭގަޔާއި، ރާއްޖެއިން ބޭރަށް ދަތުރުކުރުމަށް އޮޑިދޯނިފަހަރު ބޭނުންކުރި އިރު، މި ދަތުރުތައް ކުރުމަށް އެތައް ހަފުތާއެއް ނެގިއެވެ. ބައެއް ފަހަރު، އެތައް މަސް ދުވަސް ވެސް ނެގިއެވެ. އެހެނަސް، މިއަދު ރާއްޖެތެރޭގެ އެކިއެކި ރަށްތަކަށް ދަތުރުކުރުމަށް، އިންޖީނުލީ އުޅަނދުތައް ކަމުގައިވާ ލާންޗާއި މަތިންދާ ބޯޓު ބޭނުންކުރެވެއެވެ. އަދި އެއް ގައުމުން އަނެއް ގައުމަށް ދަތުރުކުރުމަށް ވެސް މަތިންދާ ބޯޓު ބޭނުން އެބަ ކުރެއެވެ. މި ފަދަ ދަތުރުތައް ކުރުމަށް ނަގަނީ އެންމެ ދެތިން ގަޑިއިރެވެ. ނަތީޖާއެއްގެ ގޮތުން، ދާން ބޭނުންވާ މަންޒިލާ ހަމައަށް ވަރަށް ފަސޭހައިން ވާސިލުވެވެއެވެ. އަދި އެ ތަނެއްގައި ކުރަން ބޭނުންވާ ކަންކަމާއި މަސައްކަތްތައް ކުރުމަށް ލިބޭ ވަގުތު ވެސް އިތުރުވެއެވެ. ވުމާއެކު، ދަތުރުކުރުމަށް ހޭދަކުރަން ޖެހޭ ވަގުތު މަދުވުމަކީ ދަތުރުފަތުރުކުރުމުގައި ބޭނުންކުރެވޭ ޒަމާނީ އުޅަނދުތަކުގެ ސަބަބުން ލިބޭ އަގުހުރު މަންފާއެކެވެ.

ހިތްހަމަޖެހިލައިގެން، އަރާމުކަމާއެކީ ދަތުރުކުރެވުމަކީ ވެސް މި ޒަމާނުގައި ދަތުރުފަތުރު ކުރުމަށް ބޭނުންކުރާ އުޅަނދުތަކުގެ ސަބަބުން ލިބޭ ފައިދާއެކެވެ. ކުރީ ޒަމާނުގައި އަޅުގަނޑުމެންގެ ކާބަފައިން އެއް ތަނުން އަނެއް ތަނަށް ދަތުރުކުރުމަށް ޓަކައި، ހިނގާބިނގާވެ އުޅެން ޖެހުނެވެ. ނުވަތަ ކަނޑުމަގުން ދަތުރުކުރި ނަމަ، ދޯނިން ދަތުރުކުރަން މަޖުބޫރުވިއެވެ. ދޭހާ އަތްވެއްގައި، ވެހޭހާ ވާރޭއެއްގައި މި ފަދަ ދިގު ދަތުރުތައް ކުރަން ޖެހުމުން، ވަރުބަލިކަން އިންތިހާއަށް އިހުސާސް ކުރެވުނެވެ. ނަމަވެސް، މިއަދު ކާރުތަކާއި، ފެރީތަކާއި، މަތިންދާ ބޯޓުގައި، ކޮންމެ ފަދަ މޫސުމެއްގައި ވެސް ދަތުރުކުރެވޭ އިރު، މި ފަދަ އުޅަނދުތަކުގައި އިށީނދެ އިނުމަށް ފުރުސަތު ލިބެއެވެ. ހަމައެހެންމެ، އޭ.ސީ އާއި ޓީވީގެ ޒަމާނީ ޚިދުމަތްތައް ވެސް ބައެއް އުޅަނދުތަކުން ލިބެއެވެ. މިކަމުގެ ސަބަބުން، ދަތުރުމަތީގައި އުފުލަން ޖެހޭ ތަކުލީފުތައް ލުއިވެގެން ދެއެވެ. އަދި ނުހަނު އުފަލުގައި ދަތުރުކުރެވެއެވެ. ވީމާ، ނުހަނު އަރާމާ އެކު ދަތުރުކުރެވުމަކީ ދަތުރުފަތުރުކުރުމުގައި ބޭނުންކުރެވޭ ޒަމާނީ އުޅަނދުތަކުން ލިބޭ އިތުރު ފައިދާއެކެވެ.

ދަތުރުފަތުރުކުރުމަށް ބޭނުންކުރާ ޒަމާނީ އުޅަނދުތަކުން އަޅުގަނޑުމެންނަށް އެތައް ފައިދާއެއް ލިބުނަސް، އެއިން މެދުވެރިވާ ގެއްލުންތައް ވެސް މަދެއް ނޫނެވެ. އެގޮތުން، މި ފަދަ އުޅަނދުތަކަކީ އެންމެ ޒަމާނީ އަދި އެންމެ ތަރައްގީވެފައިވާ އުޅަނދުތައް ކަމުގައި ވީ ނަމަވެސް، މި ފަދަ ކޮންމެ އުޅަނދަކުން ނުރައްކާތެރި ހާދިސާތަކާއި އެކްސިޑެންޓުތައް ވުމުގެ ފުރުސަތު ބޮޑެވެ. ހަމައެކަނި ދިވެހިރާއްޖެއަށް ބަލައިލިކަމުގައި ވިޔަސް، ކޮންމެ ހަފުތާ އަކު ވެސް، ކާރު އެކްސިޑެންޓެއް ނުވަތަ ސައިކަލު އެކްސިޑެންޓެއް ހިނގައޭ ދެންނެވުމަކީ ދޮގަކަށް ނުވާނެއެވެ. ހަމައެއާ އެކު، ކަނޑުމަގުން ދަތުރުކުރާ އެތައް އުޅަނދެއް ވެސް ވަނީ ކޮންމެ ވެސް ސަބަބެއް މެދުވެރިވެގެން، ކަނޑަށް ފެތިފައެވެ. ޒަމާނީ ވަސީލަތައް ބަރޯސާވެ އެއަށް ގޮސް ހުސްވުމުގެ ސަބަބުން އުޅަނދު ވަނީ ކޮންމެވެސް ފަރަކަށް އުރި އެތައް ގެއްލުމެއްވެފައެވެ. މީގެ އިތުރުން، މަތިންދާ ބޯޓު ވެއްޓުމުގެ ހާދިސާތަކުގެ ވާހަކަ ވެސް މަދުން ނަމަވެސް އިވެއެވެ. މި ފަދަ ކޮންމެ ހާދިސާއެއްގައި އެތައް ބަޔަކަށް އަނިޔާވެ، އެތައް ބައެއް މިދުނިޔެދޫކޮށް ދެއެވެ. ވުމާއެކު، އަނިޔާވުމުގެ ފުރުސަތު އިތުރުވުމަކީ ދަތުރުފަތުރުކުރުމުގައި ބޭނުންކުރެވޭ ޒަމާނީ އުޅަނދުތަކުގެ ސަބަބުން ލިބޭ ފޫނުބެއްދޭ ވަރުގެ ބޮޑު ގެއްލުމެކެވެ.

މި ޒަމާނުގައި ދަތުރުފަތުރުކުރުމަށް ބޭނުންކުރާ އުޅަނދުތަކުން އަޅުގަނޑުމެންގެ ތިމާވެށްޓަށް ނޭދެވޭ އަސަރުކުރާ ކަމީ އެއްވެސް ޝައްކެއް އޮތް ކަމެއް ނޫނެވެ. އެ ތޮގުން، ޒަމާނީ އުޅަނދުފަހަރުގެ އިންޖީނުތަކުން ވިހަ ގޭސްތައް ޖައްވަށް ދޫވެއެވެ. މި ފަދަ ގޭސްތައް ދުނިޔޭގެ ވައިގެ ފަށަލައިގައި ތާށިވެ، މި ފަށަލަ ހަލާކުވުމަށް މެދުވެރިވެއެވެ. މިކަމުގެ ނަތީޖާއަކަށް ވެގެން ދަނީ، އިރުގެ ނުރައްކާތެރި ދޯދިތައް މި ދުނިޔެއާ ހަމައަށް ވާސިލުވެވި، ދުނިޔެ ހޫނުވުމެވެ. މީގެ އިތުރުން، މި ފަދަ ނުރައްކާތެރި ގޭސްތަކުގެ ސަބަބުން، ވައި ތަޣައްޔަރުވުމަށް ވެސް މަގުފަހިވެއެވެ. އަދި ވައި ނުސާފުވުމުން، ނޭވާހިއްލުމުގެ ބައްޔާއި، ފުއްޕާމޭގެ ކެންސަރު ފަދަ ތަފާތު ބަލިތަކާ އިންސާނުންނަށް ކުރިމަތިލާން ޖެހެއެވެ. މި ފަދަ ކޮންމެ ނުރައްކަލެއް ވެސް މެދުވެރިވަނީ ޒަމާނީ އުޅަނދުތަކުގެ ސަބަބުންނެވެ. ވީމާ، ތިމާވެށްޓަށް ގެއްލުން ލިބުމަކީ ދަތުރުފަތުރުކުރުމުގައި ބޭނުންކުރެވޭ ޒަމާނީ އުޅަނދުތަކުގެ ސަބަބުން ކުރިމަތިވާ އިތުރު ގޮންޖެހުމެކެވެ.

ދަތުރުފަތުރުކުރުމަށް ޓަކައި ތައާރަފުވެފައިވާ އުޅަނދުތަކުން އެތައް މަންފާއެއް ކުރިއަސް، އެއިން ލިބޭ ގެއްލުންތައް ވެސް މަދެއްނޫނެވެ. އެގޮތުން، ދަތުރުކުރުމަށް ހޭދަކުރަން ޖެހޭ ވަގުތު މަދުވެ، އަރާމުކޮށް ދަތުރުކުރެވުނަސް، ނުރައްކާތެރި އަނިޔާތައްވުމުގެ ފުރުސަތު އިންތިހާއަށް ބޮޑުވެ، ތިމާވެށްޓަށް ލިބޭ ގެއްލުން ވެސް ކުޑައެއް ނޫނެވެ. އެހެންކަމަށްވުމާ އެކު، ދަތުރުފަތުރުކުރުމުގައި ބޭނުންކުރެވޭ ޒަމާނީ އުޅަނދުތަކުގެ ސަބަބުން ލިބެނީ ފައިދާތޯ ނުވަތަ ގެއްލުންތޯ، މި ކަމުގައި ގޮތެއް ނިންމާނީ ކިޔުންތެރީންނެވެ.