ރާއްޖޭގެ ނަން މަޝްހޫރު މުދައްރިސުންނާ އެކު "ސާނަވީ" ޕްރޮގްރާމް ފެށުމަށް މަދަރުސާ އޮންލައިނުން ތައްޔާރުވެއްޖެއެވެ.

މި ހިނގާ ރަމަޟާން މަސް ނިމުމާ އެކު ފެށުމަށް ހަމަޖެހިފައި ވާ، "ސާނަވީ" ޕްރޮގްރާމުގައި ދިވެހި، އިސްލާމް، އިނގިރޭސި، އިކޮނޮމިކްސް، ފިޒިކްސް، ކެމިސްޓްރީ ފަދަ މާއްދާތައް ކިޔަވައި ދެއްވާނެއެވެ. މި ހަރަކާތުގައި އިމްތިހާނުގައި ދަރިވަރުންނަށް ދިމާވާ މައްސަލަތަކާއި އެކަންކަން ހައްލު ކުރާނެ ގޮތްތަކާއި ފިލާވަޅުތައް ދަސްކުރުމުގައި ބޮޑަށް ދަރިވަރުން ސަމާލުކަން ދޭންވީ ދިމަދިމާ ފާހަގަކޮށް ކިޔައި ދެއްވާނެއެވެ. އަދި ދަރިވަރުންގެ ސުވާލުތަކަށް މުދައްރިސުން ވަގުތުން ޖަވާބު ދެއްވާނެއެވެ.

ސާނަވީ ޕްރޮގްރާމްގައި ދިވެހި ކިޔަވައި ދެއްވާނީ ޢަބްދުއްރަޙްމާނު ޙަސަންއާއި މަރްޔަމް ޢަލީ ދީދީއެވެ. ޢަބްދުއްރަޙްމާނާއި މަރްޔަމް ޢަލީ ދީދީ އަކީ ދިވެހި ކިޔަވައިދެއްވުމުގެ ތަޖުރިބާ ހުރި، އެގްޒޭމިނަރުކަން ވެސް ކުރައްވައިފައިވާ ދެ މުދައްރިސުންނެވެ. އިސްލާމް ކިޔަވައި ދެއްވާ ޤާސިމް މުޙައްމަދަކީ ގިނަ ދަރިވަރުންތަކެއް ދަންނަ މަޝްހޫރު އިސްލާމް މުދައްރިސެކެވެ. އިކޮނޮމިކްސް ކިޔަވައި ދެއްވާނީ އަޝްރަފް ޢަބްދުއްރަހީމާއި، އެ މުދައްރިސެއްގެ ނޯޓްްސްތައް ކޭމްބްރިޖުގައި ވެސް ބޭނުން ކުރާ ޢާލިމް ސަރ އެވެ. ބިޒްނަސް ކިޔަވައި ދެއްވާނީ ބިޝާރާ މިސްއާއި އިސްމާޢީލް މުޙައްމަދެެވެ. އިސްމާއީލަކީ މަޖީދިއްޔާ ސްކޫލުގެ ބިޒިނަސް ލީޑިންގ ޓީޗަރެވެ. ފިޒިކްސް ކިޔަވައިދެއްވާނީ އިބްރާޙީމް މުޒާހުއެވެ. މުޒާހުއަކީ އިސްކަންދަރު ސްކޫލުގެ ފިޒިކްސްގެ ލީޑިންގ ޓީޗަރ ވެސް މެއެވެ. ކެމިސްޓްރީ ކިޔަވައި ދެއްވާނީ އިކްރާމް ސަރ އެވެ. އިކްރާމަކީ ކެމިސްޓްރީ ކިޔަވައި ދެއްވުމުގެ އިތުރުން މި ދާއިރާއިން ދަރިވަރުންނަށް އިތުރު އެހީގެ ގޮތުގައި ފޮތް ވެސް ލިޔުއްވައިފައި ވާ ޤާބިލު މުދައްރިސެކެވެ. މީގެ އިތުރުން އިނގިރޭސި ކިޔަވައިދެއްވާނީ ޝީއަތު ބަޝީރެވެ.

"ސާނިވީ" ޕްރޮގްރާމް ފޮނުވާނީ މަދަރުސާ އޮންލައިންގެ އެފް.ބީ ޕޭޖުންނެވެ. މާއްދާތައް ކުރިއަށް ގެންދާ ދުވަސްތަކާއި ގަޑިތަކުގެ ތަފުސީލު ފަހުން ދެވޭނެއެވެ.