އުނގަންނައިދެއްވާ ފަރާތްތަކަށް ޤަދަރާއި އިޙްތިރާމް ކުރުމަކީ ކޮންމެ ދަރިވަރަކު ވެސް ކުރާން ޖެހޭނެ ކަމެއް ކަމަށް އައްޝެއިޚް ނިމާލު މުޙައްމަދު ވިދާޅުވެއްޖެއެވެ.

މަދަރުސާ އޮންލައިނުން އިއްޔެ މެންދުރުފަހު ގެނެސްދިން "ޢިލްމީ މަދަރުސާ"ގެ ދަރުސްގައި ވާހަކަފުޅު ދައްކަވަމުން ޝެއިޚް ވިދާޅުވީ، އުނގަންނައިދެއްވާ ފަރާތަކީ ކޮންމެ ކަހަލަ މީހަކަށް ވިޔަސް، އެ ފަރާތަށް އިޙްތިރާމާއި ޤަދަރު ދޭން ޖެހޭނެ ކަމަށެވެ. ދަރިވަރަކު ތަރުބިއްޔަތު ކުރުމަށް ޓަކައި، ޢިލްމު ދިނުމަށް ޓަކައި، އެ ދަރިވަރަކު އެންމެ ހިތްހަމަ ޖެހޭ ގޮތަށް މުދައްރިސަށް ވާހަކަ ނުދެކެވި ހިނގައިދާނެ ކަމަށާއި، އެހެން އެކަން ވީ ނަމަވެސް، މުދައްރިސުންނަށް ދޭން ޖެހޭ ޤަދަރާއި އިޙްތިރާމް، ކޮންމެ ކުއްޖަކު ވެސް މުދައްރިސުންނަށް ދޭންވާނެ ކަމަށެވެ.

ޝެއިޚް ވިދާޅުވީ އެދުރުންނަކީ، ޤަދަރާއި އިޙްތިރާމްދޭން ޖެހޭ، ޤަދަރުވެރި ބައެއް ކަމަށެވެ. އެއީ، ހަމައެކަނި ކިޔަވައިދޭ ބައެއް ނޫން ކަމަށާއި އެދުރުންނަކީ ތަރުބިއްޔަތުގައި ވެސް މުހިންމު ދައުރެއް އަދާކުރާ ބައެއްކަން ކީރިތި ޤުރުއާނުގެ ކަހަފު ސޫރަތުން ހާމަވާ ކަމަށް ޝެއިޚް ނިމާލު ވިދާޅުވިއެވެ. އެހެންވީމާ، އުނގެނުމަށް ޓަކައި އެދުރުގެ ގާތަށް ދާން ޖެހެނީ ދަރިވަރުކަމާއި އެކަމަށް މަސައްކަތް ކުރާން ޖެހޭނީ ދަރިވަރުކަން އަންގަވައި ދެއްވަމު ޝެއިޚް މިސާލު ދެއްކެވީ މޫސާގެ ފާނު ޢިލްމު ހޯއްދެވުމަށް ޙުޟުރު ޢަލައިހިއްސަލާމުގެ އަރިހަށް ވަޑައިގެންނެވި ވަޑައިގެންނެވުމާއި އެ ހާދިސާއިންނެވެ.

ޝެއިޚް ވިދާޅުވީ ހަމައެކަނި މި ހާދިދާއިން ވެސް، ޢިލްމުވެރިޔާގެ މަޤާމު ހާމަވާ ކަމަށާއި،  ޢިލްމު ހޯދުމަށް މަސައްކަތް ކުރާން ޖެހޭކަމާއި ޢިލްހޯދުމަށް ޢިލްމުވެރިޔާގެ އަރިހަށް ދާންޖެހޭނީ ޢިލްމަށް ބޭނުންވާ ފަރާތްކަން ހާމަވާ ކަމަށެވެ.

އުނގަންނައިދޭ ފަރާތަކީ ޤަދަރާއި އިޙްތިރާމު ކުރާންޖެހޭ ފަރާތެއްކަން އަންގަވައި ދެއްވަމުން ދެން މިސާލު ނެންގެވީ އާދަމްގެ ފާނު ޚަލްޤު ކުރެއްވުމާ ހަމައިންނެވެ. އާދަމުގެފާނު އުފައްދަވައި ސުވަރުގެ ވެއްދެވުމަށް ފަހު ﷲ މަލާއިކަތުންނަށް އެންމެހާ ތަކެއްޗަށް ކިޔާ ނަންތައް އާދަމްގެފާނަށް އުނގަންނައި ދެއްވުމަށް އެންގެވިކަމަށެވެ. ނަމަވެސް މަލާއިކަތް ބޭކަލުން ﷲ އަށް ދަންނަވައިފައި ވަނީ އިބަ އިލާހު ދެއްވި އެއްޗެއް މެނުވީ ލިބިގެނެއް ނުވާ ކަމަށެވެ. ﷲ ސުބުހާނަހޫ ވަތައާލާ އާދަމްގެ ފާނަށް ނަންތައް އުނގަނަވައިދެއްވި ކަމަށާއި، އެއަށްފަހު މަލާއިކަތުންނަށް، އެދުރެއްގެ ދައުރު އަދާކުރުމަށް އާދަމްގެ ފާނަށް ﷲ އަމުރު ކުރެއްވި ކަމަށް ޝެއިޚް ނިމާލު ވިދާޅުވިއެވެ.  ޝެއިޚް ވިދާޅުވީ މި ހާދިސާއިން ވެސް، އިސްލާމް ދީނުގައި އެދުރުންގެ ދައުރާއި މަޤާމު ހާމަވާ ކަމަށެވެ. އެހެންކަމުން އެދުރުންނަށް ދޭންޖެހޭ އިޙްތިރާމާއި ޤަދަރު ދިނުމަށް ދަރިވަރުންނަށް ޝެއިޚް ނިމާލު އިލްތިމާސް ކުރެއްވިއެވެ.