އެސް.އެސް.ސީ އެޗް.އެސް.ސީ އިމްތިޙާނު މާކު ކުރުމުގެ މަސައްކަތަށް މީހުން ނެގުމުގެ އުޞޫލަށް 3 ބަދަލެއް ގެންނަވައިފިއެވެ.

ޑިޕާޓުމަންޓް އޮފް ޕަބްލިކް އެގްޒޭމިނޭޝަންސްގެ ވެބްސައިޓުގައި މިއަދު އާންމު ކުރެއްވި އުޞޫލުގައިވާ (އުޞޫލަށް ދިއުމަށް) ގޮތުން މިފަހަރުގެ އުޞޫލަށް ގެންނަވައިފައި ވަނީ މައިގަނޑު 3 ބަދަލެކެވެ.

މިފަހަރުގެ އުޞޫލުގައި ގެންނަވައިފައިވާ ފުރަތަމަ ބަދަލަކީ، އެގްޒޭމިނަރުގެ ނަން  ލީޑް އެގްޒޭމިނަރ، މި ނަމަށް ބަދަލު ކުރެއްވުމެވެ. ދެވަނަ ބަދަލަކީ މާކިންގ މަސައްކަތަށް ކުރިމަތިލީ ފަރާތްތަކަށް (އިދާރީ ފަރާތްތައް ފިޔަވައި) އެއް ވަގުތެއްގައި އިމްތިޙާނެއް ދެވުމެވެ. ކުރީން މިކަން ކުރަމުން އައިސްފައިވަނީ، މާކަރުން ނެގުމުގެ ކުރީން އެގްޒޭމިނަރުންގެ ޓީމު ނެގުމެވެ. އެ ޓީމުން މާކިންގ ސްކީމު ފައިނަލް ކުރުމުގެ މަސައްކަތް ކުރުމަށްފަހު، މާކަރުން ނަގަނީ މާކިން ވޯރކު ޝޮޕަށްފަހުގައެވެ. އެހެންކަމުން ކުރީން އިމްތިޙާނު ކުރެވެނީ މާކަރުންނާއި އެގްޒޭމިނަރުން ވަކިވަކިންނެވެ. ނަމަވެސް މިފަރު މި ގެނެވުނު ބަދަލާ އެކު، އެގްޒޭމިނަރުންނާއި މާކަރުންގެ އިމްތިޙާނު ކުރެވޭނީ އެކުއެކުގައެވެ. މި ދެފަރާތަށް ވެސް ދެވޭނީ ހަމަ އެއް އިމްތިޙާނު ކަރުދާހެކެވެ.

މިއަދު އާންމު ކުރެއްވި އުޞޫލަށް ގެންނަވައިފައިވާ 3 ވަނަ ބަދަލަކީ، މާކަރުން ނެގުމަށް ކުރީން ބާއްވަމުން އައި މާކިންގ ވޯކްޝޮޕުގެ ބަަދަލުގައި މާކިންއަށް ނެގޭ ފަރާތްތަކަށް ތަމްރީނު ދިނުމުގެ ޕްރޮގްރާމެއް ހިންގެވުމެވެ. މި ބަދަލާ ގުޅިގެން މާކިންގ ވޯކް ޝޮޕެއް ދެން ނޯންނާނެއެވެ. އޭގެ ބަދަލުގައި ދެން ކުރިއަށްދާނީ މާކިންއަށް ހޮވޭ 40 ބައިވެރީންނަށް ހިނގޭ ތަމްރީނު ޕްރޮގްރާމެކެވެ.