މ. މުލަކު ސްކޫލުގެ ބެލެނިވެރިންގެ ޖަމްޢިއްޔާ ފަރާތުން ފާހަގަ ކުރި މަސައްކަތު ދުވަހުން، އެއްލައްކަ ފަންސާސް ހާހަށްވުރެ ގިނަ ފައިސާ ހޯދައިފިއެވެ.

އެ ސްކޫލުން އިއްޔެ އާންމު ކުރި ފައިސާގެ ތަފުސީލުގައިވާ ގޮތުން ޕީޓީއޭގެ މަސައްކަތު ދުވަހުން ލިބުނު ފައިސާގެ ޖުމުލައަކީ 154077.91 ދިވެހި ރުފިޔާއެވެ.

މުލަކު ސްކޫލުން މަޢުލޫމާތު ދެއްވި ގޮތުގައި މި ފައިސާ ޚަރަދު ކުރާނީ، ސްކޫލުގެ ދަރިވަރުން މިހާރު ކުޅޭ ސަރަހައްދުގައި، ދަރިވަރުން ކުޅިވަރު ކުޅުމަށް، 25 މީޓަރާއި 40 މީޓަރުގެ ޓާފް ދަނޑެއް އެޅުމަށާއި އެ ދަނޑު ވަށައިގެން ފެންސް ޖެހުމަށެވެ.

މުލަކު ސްކޫލުގެ ސްޕޯޓްސް ސްޕަވައިޒަރ އިބްރާހީމް ފަޔާޟް މަޢުލޫމާތު ދެއްވި ގޮތުގައި މި މަސައްކަތް ކުރުމަށް ރަށު ކައުންސިލުން ބައެއް ތަކެތި މިހާރު ވެސް ވަނީ ލިބިފައެވެ. އަދި މި މަސައްކަތް ކުރިއަށްދާ އިރު އާރުޑީސީގެ ފަރާތުން އެހީތެރިކަން ލިބޭނެ ކަމަށް ފަޔާޟް ބުނުއްވިއެވެ.

ޓާފް ދަނޑު އެޅުމަށް ޓަކައި ފައިސާ ހޯދުމަށް ޕީޓީއޭއިން މަސައްކަތު ދުވަސް ފާހަގަ ކުރީ 6 ގުރޫޕަކަށް ބަހައިލައިގެންނެވެ. މި ގުރޫޕުތަކުގެ ތެރެއިން އެންމެ ގިނަ ފައިސާ ހޯދީ ބުންވަރު ގުރޫޕެވެ. އެ ގުރޫޕުން 40093.05 ރުފިޔާ ހޯދައިފައިވެއެވެ. ދެން އެންމެ ގިނަ ފައިސާ ހޯދީ ހިތްވަރު ގުރޫޕެވެ. އެ ގުރޫޕުން ހޯދި ފައިސާގެ ޖުމުލައަކީ 33333.33 އެވެ. ތިންވަނަ އަށް އެންމެ ގިނަ ފައިސާ ހޯދީ ވިދުވަރު ގުރޫޕުންނެވެ. އެ ގުރޫޕުން ހޯދި ފައިސާގެ ޖުމުލައަކީ 30514.98އެވެ.