ނިމިދިޔަ ދިރާސީ އަހަރު، 2023 – 2024، މަޖީދިއްޔާ ސްކޫލުގެ އެންމެ މޮޅު ދަރިވަރަކަށް ހޮވިފައިވަނީ އިފްޒާލް އިބްރާހީމް މަޙްފޫޒެވެ. ދެވަނަ ހޯދީ އާނީފް އާދަމަށެވެ. ތިންވަނަ ހޯދައިފައި ވަނީ އަޝްހަމް އިބްރާހީމެވެ.

މަޖީދިއްޔާ ސްކޫލުގެ ޞަލާޙުއްދީން މާލަމުގައި މިރޭ އޮތް، އިނާމު ދިނުމުގެ ޖަލްސާގައި މަތީ އަރުތަ ހޯދި މި ތިން ދަރިވަރުންނަށް އިނާމު ދެއްވީ ޖަލްސާގެ ޝަރަފްވެރިމެހުމާނު ދިވެހިރާއްޖޭގެ ގައުމީ ޔުނިވަރސިޓީގެ ޗާންސެލަރ ޑރ. މަޙްމޫދު ޝައުޤީއެވެ.

ނިމިދިޔަ އަހަރު މަޖީދިއްޔާ ސްކޫލުގެ އެންމެ މޮޅު ދަރިވަރަކަށް ހޮވުނު އިފްޒާލް އިބްރާހީމް މަޙްފޫޒް ވަނީ އޯލެވެލް އިމްތިޙާނުން 7 އޭ ސްޓަރ، އަދި އެއް މާއްދާއިން އޭ ހޯދައިފައެވެ. ދެވަނައަށް ދިޔަ އަނީފު ވަނީ އޯލެވެލް އިމްތިޙާނުން 8 އޭ ސްޓަރ ހޯދައިފައެވެ. ތިންވަނަ ހޯދި އަޝްހަމްއަށް އޯލެވެލް އިމްތިޙާނުން ލިބިފައި ވަނީ 7 އޭ ސްޓަރ އާއި 1 އޭ އެވެ.

މަޖީދިއްޔާ ސްކޫލުން މިރޭ އާންމު ކުރެއްވި މަޢުލޫމާތުން ހާމަވާ ގޮތުގައި، 2023 – 2024 ގައި މަޖީދިއްޔާ ސްކޫލުގައި 1391 ދަރިވަރުން ތަޢުލީމް ހާސިލުކުރިއެވެ. މީގެ ތެރެއިން 153 ދަރިވަރަކު އޯލެވެލް އިމްތިޙާނުގައި ބައިވެރިވެފައިވެއެވެ. އަދި މި ދަރިވަރުންގެ ތެރެއިން 5 މާއްދާއިން 62% ދަރިވަރުން ފާސްވެފައިވެފައިވާ އިރު، 3 މާއްދާއިން ފާސްވެފައި ވަނީ 72 އިންސައްތަ ދަރިވަރުންނެވެ. ބީޓެކްގައި ބައިވެރިވި ހުރިހާ ދަރިވަރުން ވެސް ފާސްވެފައިވާ އިރު، އޯލެވެލްގެ ގަދަ 10 ގައި މަޖީދިއްޔާ ސްކޫލުގެ 27 ދަރިވަރަކު ހިމެނިފައިވެއެވެ.