ދިވެހިރާއްޖޭގެ ޢިލްމުގެ ބަގީޗާގައި ދ. އަތޮޅު ކުޑަހުވަދޫގައި ހުންނަ އެ އަތޮޅު ތަޢުލީމީ މަރުކަޒަކީ، އާނަމެއް ނޫނެވެ. ޢިލްމީ ރޮނގުންނާއި ކުޅިވަރުގެ ދާއިރާއިންނާއި އަދި އެނޫންވެސް ރޮނގުތަކުން އެމަރުކަޒަކީ ފާހަގަ ކޮށްލެވޭ ޚާއްޞަ ނަމެކެވެ.

މާލޭ،  ސްކޫލުތަކުގައި ކިޔަވާ، އަތޮޅުތަކުގެ ކުދީންނަށް ބަލާއިރު، ދ. އަތޮޅު ކުޑަހުވަދޫއަށް ނިސްބަތްވާ ކުދީން، އަތުގެ އިނގިލިތަކުން ގުނައިލެވޭހާ މަދެވެ. އެހެންނަމަވެސް، ދ. އަތޮޅު ތަޢުލީމީ މަރުކަޒުން ޢިލްމު އުނގެނި ދަސްވެނިވީ އެތައް ދަރިވަރުންނެއް، ޓީޗަރުންގެ ގޮތުގައި މާލޭގެ ނަންމަޝްހޫރު ސްކޫލުތަކުގައި މަސައްކަތް ކުރައްވަމުން އެބަ ގެންދަވައެވެ. އިސްމާޢީލް މުޙައްމަދާއި ޢާލިމާ މުޙައްމަދެވެ. ޝިރުމީނާ ޢަބްދުﷲ އާއި ޝިއުނާ ނަސީރެވެ. މިއިން ކޮންމެ ޓީޗަރަކީ ވެސް، އެޓީޗަރެއްގެ މާދާއިން ފާހަގަކޮށްލެވޭ ވަރުގަދަ "ތަނބެ"ކެވެ.  މިއިން އެނގެނީ ދ. އަތޮޅު ތަޢުލީމީ މަރުކަޒުގެ ޢީލްމީ ބިންގާ ވަރުގަދަކަމާއި އެ މަރުކަޒުގައި އުނގަންނައިދޭން ތިއްބެވި އެދުރުންނަކީ ވެސް، ޤާބިލު ބައެއްކަމެވެ. މީގެ އަނެއް މިސާލަކީ ދ. އަތޮޅު ތަޢުލީމީ މަރުކަޒުގެ އިކޮނިމިކްސް ޓީޗަރ ޢާލިމު މުޙައްމަދެވެ. އޭނާ ގެންދަވަނީ، ސްކޫލުބަންދުތަކުގައި މާލެއާއި އަތޮޅުތެރޭގެ ސްކޫލުތަކުގައި އިކޮނިމިކްސް މާއްދާއިން ސްޓަޑީ ކޭމްޕުތައް ބާއްވަމުންނެވެ.

ދ. އަތޮޅު ތަޢުލީމީ މަރުކަޒުގެ ތަޞައްވުރަކީ، ރާއްޖޭގައި ނަން ހިނގާ ނަމޫނާ ސްކޫލެއްކަމުގައިވުމެވެ. މިގޮތުން މި ސްކޫލު، މިހާރު އަމާޒު ހިފައިފައިވަނީ، ގުރޭޑު 1 ން 6 ގެ ދަރިވަރުންނަށް އިވެންޓު ބޭސްޑު ޕެޑަގޮޖީ ފައްކާ ކުރުމަށާއި އެ ގުރޭޑުތަކުގެ ދަރިވަރުންގެ ރީޑިންގ ޕްރޮގުރާމުތައް ތައްރައްޤީ ކުރުމަށާއި، ގުރޭޑު 1 ނިންމާ ކޮންމެ ދަރިވަރަކީ ވެސް، ދިވެހި، އިނގިރޭސި، ލިޔަން ކިޔަން ދަންނަ ކުއްޖަކަށް ހެދުމަށެވެ. މީގެ އިތުރުން އޯލެވެލްއާއި އެސްއެސްސީ، އަދި އޭލެވެލްއާއި އެޗްއެސްސީ އިމްތިޙާނުތަކުގެ ނަތީޖާ ރަނގަޅު ކުރުމަކީ އެ ސްކޫލުގެ އަމާޒެކެވެ.

ޔޫކޭޖީން ފެނށިގެން ގްރޭޑު 12 ށް ކިޔަވައިދޭ، ދ. އަތޮޅު ތަޢުލީމީ މަރުކަޒުގައި 771 ދަރިވަރުން ތަޢުލީމު ޙާޞިލު ކުރަމުން ދާއިރު، އެކުދިންނަށް ތަޢުލީމު ފޯރުކޮށްދިނުމަށް ޙަރަކާތެރިވެލައްވަނީ ކުޑަހުވަދޫއަށް ނިސްބަތްވާ ޓީޗަރުންނެވެ. ބިދޭސީ ޓީޗަރުންގެ އަދަދު ނުހަނުމަދު  މިސްކޫލުގައި، ދަރިވަރުންނަށް ކިޔަވައި ދެވެމުންދަނީ ޓެކްނޮލޮޖީގެ ވަސީލަތްތަކުގެ އެހީގައިކަން ފާހަގަ ކުރެވެއެވެ. ދަރިވަރުންނަށް އަމާޒުކޮށްގެން އެތައް ހަރަކާތްތަކެއް ރާވައި ހިންގަވަމުންގެންދަވައެވެ. މީގެތެރޭގައި ޔުނީފޯމު ޙަރަކާތްތަކާއި ކުލަބު ހަރަކާތްތަކާއި، ހައުސްތަކަށް އަމާޒު ކުރައްވައިގެން ހިންގަވައި ހަރަކާތްތައް ހިމެނެއެވެ.

ޔުނީފޯމު ހަރަކާތަތައް

ދ. އަތޮޅު ތަޢުލީމީ މަރުކަޒުގައި ހިންގަވާ ޔުނީފޯމު ހަރަކާތްތަކަކީ، ސްޓާ، ލިޓުލްމެއިޑު، ގައިޑު، ޕުރީ ކަބު، ކަބުސުކައުޓު، ސުކައުޓު، ކެޑޭޓެވެ.

ކުލަބު ހަރަކާތްތައް

ކުލަބު ހަރަކާތްތަކުގެ ގޮތުގައި ދ. އަތޮޅު ތަޢުލީމީ މަރުކަޒުގައި ގިނަ ކުލަބުތަކެއް ހިންގައެވެ. އެ ކުލަބުތަކަކީ، ސްޓެމް، ހެލްތު އެންޑު ހިއުމަންރައިޓްސް ކުލަބު، ޤުރުއާން ކުލަބު، ބިޒްނަސް ކުލަބު، އާރޓު ކުލަބު، އިސްލާމީ ހިޔާ، ޔަންގު ފިޝަރޒް ކުލަބު، އީއެލްއޭ، ޑީއެލްއޭ، ސްޕޯޓުސް ކުލަބެވެ.

ސްކޫލުގެ ހައުސްތައް

ސްކޫލުގައި 4 ހައުސް ހަރަކާތްތެރިވެއެވެ. މި ހައުސްތަކުން، އިންޓަރ ހައުސް މުބާރާތްތައް ރާވައި ހިންގައެވެ. ދ. އަތޮޅު ތަޢުލީމީ މަރުކަޒުގައި ހިންގާ ހަތަރު ހައުސްގެ ތެރޭގައި ހިމެނެނީ، މުމްބަރު ހައުސާއި، މާވޭރު ހައުސާއި، މާދަނޑު ހައުސާއި، ބޮޑާވައް ހައުސެވެ. މި ހައުސްތަކަށް ނަންދީފައިވަނީ، ކުރީޒަމާނުގައި ކުޑަހުވަދޫގައި މީހުން ދިރިއުޅުނު ކަމަށްބުނާ 4 އަވަށުގެ ނަމަށް ނިސްބަތްކޮށެވެ.

ކާމިޔާބީތައް

ދ. އަތޮޅު ތަޢުލީމީ މަރުކަޒު ވުޖޫދުވީ، 24 މާރިޗު 1984 ގައި ނަމަވެސް އެރަށުގައި (ދ. ކުޑަހުވަދޫ) ގައި އޭގެ ކުރިންވެސް ތަޢުލީމު ފޯރުކޮށްދެވެމުން ދިޔައެވެ. ޢިލްމީ ބަގީޗާގައި ޢުމުރުގެ ގޮތުން ދ. އަތޮޅު ތަޢުލީމީ މަރުކަޒު ކިތަންމެ ހަގުނަމަވެސް، (36 އަހަރު) އެ ސްކޫލަކީ، ނަންހިނގާ ފާހަގަކޮށްލެވޭ ސްކޫލެކެވެ. އެ ސްކޫލުވަނީ، 2014 ވަނަ އަހަރުގެ ސިވިލް ސާރވިސްގެ އިނޮވޭޝަން އެވޯޑު ހާސިލު ކޮށްފައެވެ. މީގެ އިތުރުން 2016 ވަނަ އަހަރުގެ އިންޓަރ ސްކޫލު ފުޓުބޯޅަ މުބާރާތުގެ 16 އަހަރުންދަށުގެ ރަނަރަޕުކަން ހޯދުމަށްފަހު، 2017 ވަނައަހަރު  18 އަހަރުން ދަށުގެ ޢުމުރު ފުރައިން ރަނަރަޕުކަން ހޯދައިފައިވެއެވެ.

މީގެއިތުރުން އޯލެވެލް އަދި އޭލެވެލް އިމްތިޙާނުގެ ގަދަ ދިހައެއްގެ ތެރޭގައި މި ސްކޫލުގެ ދަރިވަރުން ހިމެނެމުން އަންނަތާ ގިނަ އަހަރުތަކެއް ވެއްޖެއެވެ. އޭގެތެރޭގައި އެންމެ މޮޅު ދަރިވަރުގެ ގޮތުގައިވެސް ގިނަ ދަރިވަރުން ގިނަ އަހަރުތަކުގައި ހިމެނިފައިވެއެވެ.

ދ. އަތޮޅު ތަޢުލީމީ މަރުކަޒު ހޯދައިފައިވާ ކާމިޔާބީއާއި ހޯދަމުންދާ ކާމިޔާބުތަކުން، މައިގަނޑު ތިންކަމެއް ފާހަގަ ކުރެވެއެވެ. ފުރަތަމަ ކަމަކީ، އެ ސްކޫލާ، ބެލެނިވެރިންނާ އޮތް ވަރުގަދަ ގުޅުމާއި، ރައްޔިތުން ސްކޫލާމެދުކުރާ އިތުބާރުގެ ބޮޑުކަމެވެ. ދެވަނަ ކަމަކީ، އުނގަންނައި ދިނުމުގެ ޚިދުމަތުގައި ތިއްބެވި ޓީޗަރުންގެ ޤާބިލުކަމެވެ. ތިންވަނަ ކަމަކީ، މަތީ ސާނަވީ ގްރޭޑުތައް، ހުއްޓުމެއްނެތި ކުރިޔަށް ދިއުމާއި ހޯދަމުންދާ ކާމިޔާބެވެ.

ދ. އަތޮޅު ތަޢުލީމީ މަރުކަޒުގައި މިކަންކަން މިމަގަށް ހުރިއިރު، އަތޮޅުތެރޭގެ ހަމަހިމޭން ރަށްފުށުގެ ދިރިއުޅުން ދޫކޮށް މާލެއަށް ކިޔެވުމުގެ ނަމުގައި އައުމަކީ އެއްވެސް މާނައެއް ހުރި ކަމެއް ނޫންކަމުގެ ރިވެތި ނަމޫނާ ކުޑަހުވަދޫގެ ރައްޔިތުން މިދަނީ ދައްކަމުންނެވެ.