ތިލަދުންމަތީ ދެކުނުބުރީ (ހދ) ކުމުންދޫ ސްކޫލުގެ މުވައްޒަފުން ފެހި، މާސްކުތައް، ކޮވިޑު 19 އާ ގުޅިގެން އެރަށުގައި ޙަރަކާތްތެރިވާ ޓާސްފޯހާ ޙަވާލު ކުރައްވައިފިއެވެ. މަދަރުސާއަށް މަޢުލޫމާތު ދެއްވަމުން ކުމުންދޫ ސްކޫލުގެ ޕްރިންސިޕަލް މުޙައްމަދު އާދަމް ވިދާޅުވީ، މި މާސްކުތައް ޙަވާލު ކުރެއްވީ މިދިޔަ ހަފުތާގެ ބުދަދުވަހު ކަމަށެވެ.

އިޖްތިމާޢީ ޚިދުމަތެއްގެ ގޮތުން ކުމުންދޫ ސްކޫލުގެ މުވައްޒަފުން ގޭގައި ތިބެގެން މާސްކުފެހުމުގެ ބޭނުމަކީ، ކޮވިޑުގެ ނުރައްކާ ރާއްޖޭއަށް ފެތުރެމުންދާ މިނުރައްކާތެރި ދުވަސްވަރު، މާސްކު އަޅައިގެން އުޅުމަށް ބާރުއެޅުމާއެކު، ކޮވިޑުގެ ކަންކަމުގައި އިސްވެ ހަރަކާތްތެރިވާ ފަރާތްތަކަށް، އެހީތެރިވެ އެއްބާރުލުން ދިނުން ކަމަށް ޕްރިންސިޕަލް ވިދާޅުވިއެވެ. އިތުރަށް ވިދާޅުވީ މުވައްޒަފުންގެ މަސައްކަތުން 200 ވަރަކަށް މާސްކު ފަހައި، ކުމުންދޫގައި ހަރަކާތެރިވާ ޓާސްފޯހާ ހަވާލު ކުރެވިފައިވާ ކަމަށެވެ.

ކުމުންދޫ ސްކޫލުގެ އިތުރުން، އެ އަތޮޅުގެ ބައެއް ރަށްރަށުގެ ސްކޫލުތަކުން ވެސް، މާސްކުފައި، އެ ރަށްރަށުގައި ހަރަކާތްރިވާ ޓާސްފޯސްތަކާވަނީ ހަވާލު ކުރައްވައިފައެވެ.