(އިއްޔެގެ ސިޓީއާ ގުޅޭ……)

ބައްޕަގެ ހަނދާނާއި، ލޯބި، ކަޑު ހުރަސްކޮށްދަނީ، މާލެޔަށެވެ. ބައްޕަގެ އަމިއްލަ އަމީނާގެ ކައިރިޔަށެވެ. ބައްޕަގެ އެންމެ ގާތް ބެއިފުޅުންކޮޅާއި، ހަމަޔަށެވެ. ދުވަހަކު ދެގޮތެއް ނުވާނޭކަން ބައްޕަޔަށް ޔަގީންވާ މަދު، ވަރަށް މަދު، ރަހުމަތްތެރީން ކޮޅަކާއި، ހަމަޔަށެވެ. ކުއްލިޔަކަށް ހަނދާނާއި، ލޯބި އެ މިސްރާބު ޖަހަނީ، ރާއްޖޭގެ ބައެއް ރަށްރަށާއި ދިމާޔަށެވެ. އެ ރަށްރަށަށް ފޮނުވައި ލެވިފައިވާ ބައްޕަގެ ލޯބިވެރި އަޚުންނާއި، ތެދުވެރި ރަހުމަތްތެރީންނާއި، ދިމާޔަށެވެ. އަހަރެންގެ ހިތްހަމަ ޖެހެއެވެ. އަހަރެންގެ އެންމެ ގާތް ބެއިފުޅުންކޮޅަށްޓަކައި، އަހަރެންގެ ލޮބުވެތި ދަރިފުޅަށްޓަކައި، އަހަރެންގެ ވަފާތެރި ރަހުމަތްތެރީން ކޮޅަށްޓަކައި، އަހަރެން ފަޚްރުވެރިވަނީ، ނިހާޔަތުގެ ދަރަޖައަށެވެ. ތެދުވެރިކަމާއި، ވަފާތެރިކަމުގެ ފުރިހަމަ ނަމޫނާތަކެކެވެ. ލޯބިވެރިކާމާއި، ހަރުދަނާކަމުގެ ބަހުސެއް ނެތް މިސާލުތަކެކެވެ.

ލޯބިވެރި އަމީނާ އެވެ!  ދަރިފުޅުގެ ވެސް ހަގީގީ އަގު ބައްޕަޔަށް މި އެގުނީ، މިފަހަރު އެވެ. ބައްޕަގެ ހަރުދަނާ ދަރިޔެކެވެ. ގައުމުގެ ތެދުވެރި ޚާދިމާއެކެވެ. އަމީނާގެ އޯގާވެރި ބަސްތަކުންނާއި، އެހީތެރި ނަސޭހަތްތަކުން ބައްޕަޔަށް ލިބުނު ސާބިތުކަމާއި، ހިތްހަމަޖެހުން، ބޮޑުވެފައި، ސައްހަ އެވެ. … ބައްޕަގެ ހިތަށް ދަތިވާންވީ ކޮން ކަމަކާއި ހެއްޔެވެ؟ ދެރަވާންވީ ކޮން ސަބަބަކާއި ހުރެ ހެއްޔެވެ؟ އިއްޔެ ބައްޕަގެ ރަހުމަތްތެރީން ކަމަށް ދެކިގެން އުޅުނު މީހުންގެ ހުނުމުން ކުރާނީ ކޮން އަސަރެއް ހެއްޔެވެ. އެމީހަކު ކުރި ކަމެއް އެމީހަކަށް ނޫން ހެއްޔެވެ؟ …. ބައެއް މީހުންގެ ހަދާންތައް ހިތަށް ވަނުމުން، އެމީހުންގެ އިއްޔެގެ އަމަލާއި، މިއަދުގެ އަމަލު ހިތުގެ ތެރޭގައި، އާލާވުމުން، ބައްޕަގެ ގާތަށް އަންނަނީ، ހިންޏެވެ. ލަވަހޮޅިތަކެކޭ އެމީހުންނެކޭ އެއްވެސް ތަފާތެއް ވޭހެއްޔެވެ. އިވެމުންދާނީ އަޅައިފައިވާ އެއްޗެކެވެ. ގަލަމާއި ދުލުން ބެއިނުން ކުރާނީ، އެފަހަރަކު ތިބި ވެރީންގެ ބަޔަކު، އުހައު ވާނޭހާ ވާހަކަ އެކެވެ. އިއްޔެ، ބައްޕަޔަކީ، ދިވެހިރާއްޖޭގެ ތަރައްގީ އާއި، ތަހުޒީބުގެ ޢިލްމާއި، ހުނަރުގެ ލާމަސީލު ބަފައެކެވެ. މިއަދު ބައްޕަޔަކީ، …. އެމީހުންގެ އިބާރާތްތައް ބަޔާން ކުރެވޭ ވަރަށްވުރެ، "މަތިވެރި" އެވެ. މުނާފިގު ކަމަކީ،  ދެ ދުނިޔެއިން މީހާ ނެތިކޮށްލާ ކަމެއް ކަމާއި، މެދު ކުޑަވެސް ޝައްކެއް ނެތެވެ.

ލޮބުވެތި ދަރިފުޅާއެވެ! މި ސިޓީ ނުނިމެގެން އުޅެނިކޮށް، އައިސް އެ ޖެހުނީ، ބަރަކާތްތެރި ރަބީއުލް އައްވަލް މަހުގެ 15 ވިލޭރެ އެވެ. ދަރިފުޅުގެ ކައިވެނި ވުމަށް، ކަޑައަޅާފައިވާ ރެއެވެ. … އާހް!

ހުރި އެންމެ ދަރިއެއްގެ ކައިވެނިވާން މި ޖެހުނީ، ބައްޕަޔާއި، ދެ ފަސްގަޑެއްގަ އެވެ. ކުރާނޭ ކަމެއް، ނެތެވެ. މާތް ރަސްކަލާގެ މިންވަރުފުޅެވެ. ޙަމްދާއި، ޝުކުރު ހުރީ، އެކަލާގެ ކިބަފުޅަށެވެ.

އަމީނާ އެވެ! ވިސްނާ ފިކުރު ކުރާށެވެ. އަހާ، ހަދާން ކުރާށެވެ. ދުނިޔެއާއި، އާޚިރަތުގެ އެހެން ކޮންމެ ކަމެކޭ، އެއްފަދައިން، ކައިވެންޏެއްގެ، ކާމިޔާބީގެ ސިއްރަކީ، ތެދުވެރިކަމާއި، ވަފާތެރިކަމެކެވެ. މުރާލިކަމާއި، ހިއްމަތްތެރި ކަމެވެ. ލޯބިވެރިކަމާއި، އޯގާވެރިކަމެވެ. މިހާތަނާއި ޖެހެންދެން، ތެދުވެރި ލޯބިވެރި، ދަރިޔެއްކަން ސާބިތު ކުރަމުން ތިޔަ އައި ފަދަ މަތިވެރި ގޮތެއްގައި، ލޯބިވެރި، ކިޔަމަންތެރި، އަންބެއްގެ ވާޖިބުތައް އަދާ ކުރަމުން ގެންދާށެވެ. ކުއްޖެއްގެ ދިރިއުޅުން ދޫކޮށްލާފައި، މީހެންގެ ދިރިއުޅުމަށް އެބުރޭށެވެ. ގެވެހިކަމުގެ ސިއްރުތަކާއި، ހިކްމަތްތަކުގެ ތެރެއަށް ވަންނާށެވެ.   މާދަމަޔަށްޓަކައި ތައްޔާރުވާން ފަށާށެވެ. މާދަމާއަކީ، ޒުވާން މަންމައެއްގެ ވާޖިބުތައް، ދަރިފުޅު އަދާކުރާން ފަށައި ގަންނާންޖެހޭ ދުވަހެވެ. ދަރީންގެ ހުންނާނީ މައިންބަފައިންގެ ހުރިނަމަ ހުރި ސިފައެކެވެ. ދަރީންގެ ނަމޫނާއެއް ކަމުގައި ހިމެނޭނީ، މައިންބަފައިންނެވެ.

ލޮބުވެތި އަމީނާ އެވެ! ބައްޕަ ތަކުރާރުކޮށް ބުނަމެވެ. އަންބެއްގެ ވާޖިބުތައް ފުރިހަމައަށް އަދާކުރާން ފަށައިގަންނާށެވެ. ފިރިމީހާ ރުހޭ، ހެޔޮލަފާ، ގޮތްތަކަކަށް، ތިމާގެ މިޒާޖާއި، އުޅުމާއި، އެދުންތައް، ބަދަލު ކުރެވޭތޯ، ހިތްމަތާއި އެކު މަސައްކަތް ކުރަމުން ގެންދިއުމީ ކޮންމެ ބައެއްގެ މައްޗަށް ވާ މުގައްދަސް، ވާޖިބެކެވެ. ސަމާލުކަން ނުދޭ ކިތަންމެ ކުޑަކުޑަ ކަމެއް ނަމަވެސް، ދޫވެގެން ދިޔަ ނުދޭށެވެ. ފިރިމީހާގެ ކެއުން، އަންނައުނު، ކުޅިވަރުތައް، ….. މިފަދަ ކަންކަމަށް، އެކަށީގެންވާ އެންމެ މަތިވެރި، ދަރަޖައެއްގެ އޯގާވެރިކަން ބަހައްޓާށެވެ. އެމީހާގެ ރީއްޗަކީ، އެމީހެއްގެ ޝަރަފަކީ، އަބިމީހާގެ ރީއްޗާއި، ޝަވްޚު ކަމުގައި ހަދާށެވެ. އެމީހާގެ އިންޓްރަސްޓް އަކީ، އަބިމީހާގެ ވެސް، އިންޓަރަސްޓް ކަމުގައި ހަދާށެވެ. އެމީހާގެ ރަހުމަތްތެރީންނާއި، އެމީހާގެ އާދަކާދަތަކާއި، އިންކްލިންޝާންތަކީ، އަބިމީހާގެ ވެސް، އިންކްލިންޝާން ކަމުގައި، ހަދާށެވެ. (ނިމުނީ)